कबड्डी : विजय क्लबची विजयी सलामी

अमर क्रीडा मंडळाने मध्यांतरातील १९-२५अशा ६गुणांच्या पिछाडीवरून साऊथ कॅनरा क्लबचा ४०-३४असा पाडाव करीत पुढची फेरी गाठली.

मुंबई : विजय क्लब, अमर मंडळ, शिवशक्ती मंडळ यांनी वंदे मातरम् क्रीडा मंडळने आपल्या "अमृत महोत्सवी वर्षानिमित्त" आयोजित प्रथम श्रेणी पुरुष गट कबड्डी स्पर्धेत विजयी सलामी दिली. भोईवाडा-परेल येथील सदाकांत ढवण मैदानात आज पासून सुरू झालेल्या उदघाटनिय सामन्यात विजय क्लबने शिवनेरी मंडळाचा ४२-२६असा पराभव करीत विजयी सलामी दिली. मध्यांतरापर्यंत चुरशीनें खेळल्या गेलेल्या या सामन्यात विश्रांतीला विजयकडे १८-१६अशी छोटीशी आघाडी होती. अभिषेक रामाणे,विजय दिवेकर, रोशन थापा यांनी मध्यांतरानंतर आपला खेळ गतिमान करीत हा विजय साकारला. शिवनेरीकडून निखिल जाधव, नितेश यांनी चांगला खेळ केला.

दुसऱ्या सामन्यात अमर क्रीडा मंडळाने मध्यांतरातील १९-२५अशा ६गुणांच्या पिछाडीवरून साऊथ कॅनरा क्लबचा ४०-३४असा पाडाव करीत पुढची फेरी गाठली. अमन शेख,अविनाश थोरवे यांच्या चतुरस्त्र खेळामुळे साऊथ कॅनराने विश्रांती पर्यंत ६गुणांची आघाडी आपल्याकडे राखण्यात यश मिळविले होते.पण ती त्यांना राखण्यात अपयश आले. उत्तरार्धात अमरच्या सिद्धेश पांचाळ, नितीन विचारे यांनी टॉप गिअर टाकत ही आघाडी मोडून काढली आणि ६गुणांनी संघाला विजयी करीत दुसरी फेरी गाठली. शेवटच्या सामन्यात शिवशक्तीने वीर बजरंग कबड्डी संघाचा ४६-२७असा सहज पराभव करीत आगेकूच केली. शिवशक्तीकडून विराज सोनी, दीपक शिंदे,तर वीर बजरंग कडून निखिल शिंदे यांचा खेळ उत्तम होता.