मुंबईने वॉरियर्सला नमवले

यजमान मुंबई रॉकेट्सने प्रीमियर बॅडमिंटन लीग (पीबीएल) स्पर्धेत शानदार विजयी सलामी देताना भारताची अव्वल बॅडमिंटनपटू सायना नेहवालच्या नेतृत्त्वाखालील अवध वॉरियर्सला

मुंबई : यजमान मुंबई रॉकेट्सने प्रीमियर बॅडमिंटन लीग (पीबीएल) स्पर्धेत शानदार विजयी सलामी देताना भारताची अव्वल बॅडमिंटनपटू सायना नेहवालच्या नेतृत्त्वाखालील अवध वॉरियर्सला २-१ असे नमवले.
वरळी येथील नॅशनल स्पोटर््स क्लब आॅफ इंडिया (एनएससीआय) स्टेडियममध्ये झालेल्या या पहिल्याच सामन्यात अपेक्षेप्रमाणे ‘ट्रम्प मॅच’ सर्वाधिक लक्षवेधी आणि निर्णायक ठरली. मुंबईने पाच लढतींच्या सामन्यात ३ तर अवधने २ लढती जिंकल्या. मात्र दोन्ही संघांनी आपआपले ट्रम्प मॅच गमावल्याने प्रत्येकी २ गुणांचा फटका बसला. त्यामुळे मुंबईने अखेर २-१ अशी बाजी मारली. त्याचवेळी ऐनवेळी कर्णधार सायनाला दुखापतीमुळे माघार घ्यावी लागल्याचा मोठा फटकाही अवध संघाला बसला.
आरएमव्ही गुरुसाईदत्तने यजमानांना शानदार विजयी सुरुवात करुन दिली. त्याने पुरुष एकेरी लढतीत अवधच्या बी. साई प्रणीतचे कडवे आव्हान १४-१५, १५-१०, १५-८ असे परतावले. महिला एकेरीत मुंबईच्या रुत्विका गादेने अवधच्या जी. वृशालीचा १५-१३, १५-१० असा धुव्वा उडवला.
यानंतर पुरुष दुहेरीत मुंबईच्या व्लादीमीर इवानोव्ह - मथायस बोए या बलाढ्य जोडीने आपल्या लौकिकानुसार खेळ करताना अवध्यच्या केई युन - हेंद्रा गुनावन यांचा १५-११, १५-११ असा फडशा पाडला. ही लढत अवधची ट्रम्प लढत होती. मात्र यामध्ये मुंबईकरांनी बाजी मारली. तर यानंतर आपल्या ट्रम्प लढतीचा वचपा काढताना अवधच्या तानोंगसाक सेनसोमबूनसुक ने पुरुष एकेरीच्या लढतीत बलाढ्य एचएस प्रणयला १५-१२, १४-१५, १५-१४ असा धक्का दिला. ही लढत मुंबईची ट्रम्प लढत होती. (क्रीडा प्रतिनिधी)

फुलराणी सायना नेहवालची माघार
गतमोसमात दुखापतींमुळे प्रमुख स्पर्धेत
फटका बसलेल्या सायना नेहवालला पीबीएलच्या पहिल्याच सामन्यात धक्का बसला. पायाला झालेल्या दुखपतीमुळे तीने कोणताही धोका न पत्करण्याचा निर्णय घेत रॉकेट्सविरुध्दच्या सामन्यातून माघारी घेतली.
या सामन्यासाठी मुख्य आकर्षण असलेली ‘फुलराणी’च खेळणार नसल्याचे समजल्यावर प्रेक्षकांमध्ये नाराजी पसरली. आॅलिम्पिक
वर्ष असल्याने कोणताही धोक पत्करणार नसल्याचे सांगताना सायना म्हणाली की, काही आठवड्यांपूर्वी माझ्या पायाला
दुखापत झालेली.
ही दुखापत गंभीर असून मी यातून सावरत आहे. आम्हाला अजून पाच सामने खेळावयाचे असून दुखापतीतून सावरल्यानंतर मी नक्की खेळेल. आम्ही या लीगमध्ये नक्कीच चांगली कामगिरी करु.

कोर्टवर बॉलिवूडचा तडका; जॅकलिनचे अप्रतिम नृत्य
बॉलिवूडच्या रंगतदार तडक्याने पीबीएलचा शानदार उद्घाटन सोहळा रंगला. जागतिक बॅडमिंटन खेळाडूंसह बॉलिवूड स्टार्स कोर्टवर पाहायला मिळाल्याने सोहळा जबरदस्त रंगला.
बॉलिवूड अभिनेत्री जॅकलिन फर्नांडिस हिने अप्रतिम नृत्य करताना स्टेडियममधील हजारो प्रेक्षकांना आपल्या तालावर नाचवले.
त्याचवेळी प्रसिध्द संगीतकार समीम - सुलेमान या जोडीने आपल्या म्युझिकचा डबल धमाका सादर केला. याव्यतिरीक्त रोशनाईचा झगमगाट आणि प्रेक्षकांचा मिळालेला मोठा प्रतिसाद यामुळे एनएससीआयचे स्टेडियम दणाणून गेले.