पाकने मालिका जिंकली

पाकिस्तानने रविवारी खेळल्या गेलेल्या चौथ्या टी-२० क्रिकेट सामन्यात वेस्ट इंडिजचा ७ गडी राखून पराभव केला आणि मालिकेत ३-१ ने सरशी साधली

पोर्ट आॅफ स्पेन : अहमद शहजादच्या (५३) आक्रमक अर्धशतकी खेळीच्या जोरावर पाकिस्तानने रविवारी खेळल्या गेलेल्या चौथ्या टी-२० क्रिकेट सामन्यात वेस्ट इंडिजचा ७ गडी राखून पराभव केला आणि मालिकेत ३-१ ने सरशी साधली.
वेस्ट इंडिजच्या ८ बाद १२४ धावसंख्येच्या प्रत्युत्तरात खेळताना पाकिस्तानने १९ षटकांत ३ गड्यांच्या मोबदल्यात १२७ धावा फटकावत विजय साकारला.
पाकिस्तानने नाणेफेक जिंकून प्रथम क्षेत्ररक्षण स्वीकारण्याचा निर्णय घेतला. वेस्ट इंडिजतर्फे चाडविक वॉल्टनने ४ षटकार व २ चौकारांच्या मदतीने ४० धावा फटकावल्या. १ बाद ५२ धावा अशा सुस्थितीत असलेल्या विंडीज संघाने त्यानंतर ८३ धावांच्या मोबदल्यात ७ विकेट गमावल्या. हसन अली व शादाब खान यांनी किफायती मारा करताना प्रत्येकी दोन बळी घेतले.