खेळपट्टीच्या वेगामुळे आरसीबीचे फलंदाज चकित

रविवारी रात्री खेळल्या गेलेल्या लढतीत कोलकाता नाईट रायडर्सने रॉयल चॅलेंजर्स बेंगळुरूच्या तोंडचा विजयाचा घास हिरावला.

सौरभ गांगुली लिहितात...

रविवारी रात्री खेळल्या गेलेल्या लढतीत कोलकाता नाईट रायडर्सने रॉयल चॅलेंजर्स बेंगळुरूच्या तोंडचा विजयाचा घास हिरावला. त्यानंतर विराट कोहलीची प्रतिक्रिया अपेक्षित होती. बेंगळुरूसाठी ही महत्त्वाची लढत होती. या लढतीत गुणांची कमाई करता आली असती तर त्यांना गुणतालिकेतील स्थानामध्ये सुधारणा करण्याची संधी होती. ईडनच्या खेळपट्टीवर १३२ धावांचे लक्ष्य मोठे नव्हते, पण कोलकाताच्या वेगवान गोलंदाजांनी बेंगळुरूला गुडघे टेकविण्यास भाग पाडले. सध्या ईडनगार्डन्सवरील खेळपट्टी देशातील सर्वोत्तम खेळपट्ट्यांपैकी एक आहे. या खेळपट्टीवर प्रत्येकाला आपली प्रतिभा दाखविण्याची संधी असते. रविवारी खेळल्या गेलेल्या लढतीत पहिल्या डावात फिरकीपटूंनी वर्चस्व गाजवले तर दुसऱ्या डावात वेगवान गोलंदाजांनी वरचष्मा राखला.
आयपीएलच्या दहाव्या पर्वातील जवळजवळ अर्धा टप्पा आटोपला आहे. ईडनवरील वातावरण शानदार होते. येथे प्रत्येक तिकीट विकले गेले होते. देशभर आयपीएलच्या लढतींसाठी चाहते मैदानावर गर्दी करीत आहेत. टी-२० क्रिकेटमध्ये बेंगळुरूच्या यजुवेंद्र चहलसाठी सध्या सुगीचे दिवस आहेत. राष्ट्रीय संघातर्फे चमकदार कामगिरी केल्यानंतर तो एक दर्जेदार गोलंदाज म्हणून छाप सोडत आहे.
नाईट रायडर्सने आक्रमक सुरुवात केली होती, बेंगळुरूचे फिरकीपटू त्यांना रोखण्यात यशस्वी ठरले. स्टेडियममध्ये उपस्थित ७५ टक्के चाहत्यांना पाहुणा आरसीबी संघ सहज विजय मिळवेल, असे वाटत होते. नॅथन कुल्टर नाईलने वेगवान मारा करीत सुरुवातीला विराट कोहलीला बाद केल्यामुळे केकेआरला लय गवसली. केकेआरने ईडनच्या खेळपट्टीला अनुकूल संघाची निवड केली होती.
माझ्या मते बेंगळुरूचे खेळाडू खेळपट्टीच्या वेगामुळे चकित झाले असतील. कारण ख्रिस गेल आणि ए.बी. डिव्हिलियर्स यांच्यासारखे दिग्गज खेळाडू अशा पद्धतीने बाद झाल्याचे क्वचित बघायला मिळते. टी-२० क्रिकेटमध्ये संपूर्ण संघ बाद होण्याचा योग दुर्लभ असतो. त्यामुळे रायडर्सला विजयाचे श्रेय द्यायला हवे. आयपीएलने आणखी एका नव्या आठवड्यात प्रवेश केला आहे. काही संघ गुणतालिकेत वरच्या स्थानी आहेत तर काही संघांची तळाकडे घसरण झाली आहे.
दिल्ली डेअरडेव्हिल्स आणि गुजरात लायन्स या दोन्ही संघांची कदाचित निराशा झाली असेल. गुजरातला गृहमैदानावर सलग दोन सामने गमवावे लागले. त्यामुळे हा संघ अडचणीत येण्याची शक्यता आहे. सुधारणा होत असल्याचे दिसत असलेल्या संघामध्ये रायजिंग पुणे सुपरजायंट््स संघाचा समावेश आहे. धोनीला सूर गवसला असून संघ व्यवस्थापनाने योग्यवेळी समतोल साधल्यामुळे संघाची कामगिरी चांगली होत आहे.
(गेमप्लान)