ऋषभ-संजूची वादळी फटकेबाजी

वृषभ पंत आणि संजू सॅमसन यांच्या वादळी खेळीच्या जोरावर दिल्लीने गुजरातचा 7 विकेट्स राखून धुव्वा उडवला

नवी दिल्ली : भल्यामोठ्या लक्ष्याचा यशस्वी पाठलाग करताना दिल्ली डेअरडेव्हिल्सने ऋषभ पंत व संजू सॅमसन यांच्या वादळी खेळीच्या जोरावर गुजरात लायन्सला ७ विकेट्सने लोळवले. यासह पराभवाच्या गर्तेत सापडलेल्या दिल्लीने सलग दुसरा विजय नोंदवताना प्लेआॅफ गाठण्याच्या आशा कायम राखल्या असून गुजरातचे आव्हान जवळपास संपल्यात जमा झाले आहे. 

फिरोझशाह कोटला स्टेडियवर झालेल्या या सामन्यात दिल्लीकरांनी चांगली सुरुवात करताना गुजरातला झटपट दोन धक्के दिले. मात्र, नंतर गुजरातचा कर्णधार सुरेश रैना व दिनेश कार्तिक यांनी गुजरातला २० षटकांत ७ बाद २०८ धावांची मजबूत मजल मारून दिली. या वेळी, दिल्लीच्या हातून हा सामना निघून गेल्याचेच चित्र दिसत होते. परंतु, सॅमसन - पंत यांंच्या जोरावर दिल्लीने १७.३ षटकांतच बाजी मारताना ३ बाद २१४ धावा केल्या. 
कर्णधार करुण नायर (१२) अपयशी ठरल्यानंतर सॅमसन - पंत यांनी १४३ धावांची तुफानी भागीदारी करून दिल्लीला विजयी मार्गावर आणले. सॅमसनने ३१ चेंडंूत ७ षटकारांचा नजराणा पेश करून ६१ धावा कुटल्या. दुसरीकडे, पंतने ४३ चेंडूंत ९७ धावांची वादळी खेळी केली. विशेष म्हणजे अनुभवी रवींद्र जडेजावर हल्ला चढवताना या दोघांनी त्याला २ षटकांत २८ धावांचा चोप दिला. हे दोघे बाद झाल्यनंतर श्रेयस अय्यर व कोरी अँडरसन यांनी दिल्लीच्या विजयावर शिक्कामोर्तब केले. पंत शतकापासून केवळ ३ धावा दूर असताना बाद झाला.  तत्पूर्वी, द्वेन स्मिथ - ब्रेंडन मॅक्युलम ही आक्रमक सलामी जोडी स्वस्तात परतल्यानंतर रैनाने केलेल्या तडाखेबंद अर्धशतकाच्या जोरावर गुजरातने धावांचा डोंगर रचला. 
स्मिथ (९) आणि मॅक्युलम (१) स्वस्तात परतल्याने गुजरातची दुसऱ्याच षटकात २ बाद १० धावा अशी अवस्था झाली होती. मात्र, रैनाने सगळी सूत्रे आपल्याकडे घेत चौफेर फटकेबाजी करत ४३ चेंडूत ५ चौकार व ४ षटकारांसह ७७ धावांची खेळी केली. रैनानंतर कार्तिकने आक्रमक पवित्रा घेत ३४ चेंडूंत ५ चौकार व ५ षटकारांसह ६५ धावा काढल्या. अखेरच्या काही षटकांमध्ये रवींद्र जडेजाने (७ चेंडूंत १८*) केलेल्या फटकेबाजीमुळे गुजरातने दोनशेचा पल्ला पार केला. (वृत्तसंस्था)

संक्षिप्त धावफलक
गुजरात लायन्स : २० षटकांत ७ बाद २०८ धावा : (सुरेश रैना ७७, दिनेश कार्तिक ६५; कागिसो रबाडा २/२८, २/३०) पराभूत वि. दिल्ली डेअर डेव्हिल्स : १७.३ षटकांत ३ बाद २१४ धावा (ऋषभ पंत ९७, संजू सॅमसन ६१; रवींद्र जडेजा १/२८, बासिल थम्पी १/४०, प्रदीप संगवान १/४३).