‘सचिन अ बिलियन ड्रीम’चे ट्रेलर रिलीज

प्रत्येक क्रिकेट रसिकाला सचिन तेंडुलकरच्या आयुष्यावर आधारित चित्रपटाची उत्सुकता लागून राहिली आहे. अशातच सचिन अ बिलियन ड्रीम या चित्रपटाचा ट्रेलर आज रिलीज करण्यात आला आहे.

ऑनलाइन लोकमत
मुंबई, दि. 13 - प्रत्येक क्रिकेट रसिकाला सचिन तेंडुलकरच्या आयुष्यावर आधारित चित्रपटाची उत्सुकता लागून राहिली आहे. अशातच सचिन अ बिलियन ड्रीम या चित्रपटाचा ट्रेलर आज रिलीज करण्यात आला आहे. सचिन तेंडुलकर याने आपल्या ट्विटरवरुन ट्रेलर रिलीज केले आहे. यामध्ये सचिनच्या आयुष्यात घडलेल्या घटनेचा प्रवास दाखवण्यात आला आहे. सचिन कसा घडला याचे चित्रण करण्यात आले आहे.

या ट्रेलरमधील सचिनची काही वाक्यं अक्षरश: मनाचा ठाव घेणारी आहेत. क्रिकेट खेळणं हे माझ्यासाठी मंदिरात जाण्यासारखं होतं. असं म्हणत सचिननं या ट्रेलरमध्ये आपली क्रिकेटविषयी असणारी भावना व्यक्त केली आहे. या सिनेमात खुद्द सचिन तेंडुलकरनं भूमिका साकारली आहे. हा सिनेमा वास्तवावर बेतलेला असल्यानं याचा ट्रेलरही तसाच करण्याचा प्रयत्न दिग्दर्शकानं केला आहे. यात सचिन आणि त्याच्या कुटुंबीयांची काही जुनी दृश्यही दाखवण्यात आली आहे. 
प्रत्येक क्रिकेटरच्या स्वप्नातील सचिन तेंडूलकरचा प्रवास सचिन अ बिलियन ड्रीम या त्याच्या आयुष्यावर आधारित चित्रपटातून पुन्हा एकदा अनुभवायला मिळणार आहे. चित्रपटापूर्वी सचिन प्लेइंग विथ माय वे या आत्मचरित्राच्या माध्यमातून चाहत्यांपर्यंत पोहोचला होता. त्याच्या आयुष्यातील अगदी महत्त्वाच्या गोष्टी पुस्तकाच्या माध्यमातून समोर आल्यानंतर देखील त्याच्या आयुष्यावर आधारित चित्रपटाबद्दल तमाम भारतीयांमध्ये उत्सुकता दिसून येते. नुकतेच सचिनने 100 एमबी हे अ‍ॅप लाँच केले आहे. या अ‍ॅपच्या माध्यामातून सचिन आपल्या चाहत्याशी कनेक्ट राहत आहे.
जेम्स अर्सकाईन मास्टर ब्लास्टर सचिन तेंडुलकरच्या आयुष्यावर आधारित सचिन अ बिलियन ड्रीम या चित्रपटाचे दिग्दर्शन करत असून हा चित्रपट 26 मे ला प्रेक्षकांच्या भेटीला येणार आहे. या चित्रपटात मराठी अभिनेता मयुरेश पेम मास्टर ब्लास्टर सचिन तेंडुलकरचा भाऊ नितीन तेंडुलकरची भूमिका साकारत आहे.