सायना पराभूत

वर्ल्ड सुपर सीरिज फायनल बॅडमिंटन स्पर्धेच्या उपांत्य फेरीत पराभवाचा सामना करावा लागला़ त्यामुळे तिचे या स्पर्धेचे जेतेपद मिळविण्याचे स्वप्न धुळीस मिळाले़

वर्ल्ड सुपर सीरिज फायनल : उपांत्य फेरीच्या सामन्यात तेई जू यिंगकडून पराभव
दुबई : भारताची स्टार बॅडमिंटनपटू सायना नेहवाल हिला वर्ल्ड सुपर सीरिज फायनल बॅडमिंटन स्पर्धेच्या उपांत्य फेरीत पराभवाचा सामना करावा लागला़ त्यामुळे तिचे या स्पर्धेचे जेतेपद मिळविण्याचे स्वप्न धुळीस मिळाले़
सायनाला ५३ मिनिटांपर्यंत रंगलेल्या सेमीफायनल लढतीत चिनी तैपेईच्या तेई जू यिंग हिच्याकडून २१-११, १३-२१, ९-२१ अशी मात खावी लागली़ विशेष म्हणजे या लढतीत सायनाची बाजू वरचढ मानली जात होती; मात्र तिला लौकिकास साजेसा खेळ करता आला नाही़
या सामन्यात सायनाने आक्रमक सुरुवात करताना पहिला गेम २१-११ ने सहज आपल्या नावे करीत विजयाच्या दिशेन आगेकूच केली; मात्र जागतिक क्रमवारीत नवव्या स्थानावर असलेल्या तेई हिने पुढचे दोन्ही गेम आपल्या नावे करताना थाटात फायनलमध्ये प्रवेश मिळविला़ सायनाने जबरदस्त कामगिरी करताना पहिल्या गेममध्ये ४-० अशी आघाडी मिळविली़ त्यानंतर प्रतिस्पर्धी खेळाडूला तोंड वर करण्याची संधी न देता २१-११ ने हा गेम आपल्या नावे केला़
दुसऱ्या गेममध्येही सायनाने ४-० अशी आघाडी मिळविली;मात्र तेई जू यिंग हिने जोरदार मुसंडी मारताना तेईने सलग गुणांची कमाई करताना २१-१३ ने गेम जिंकला़ तिसऱ्या आणि निर्णायक गेममध्ये सायनाला खेळाचा स्तर उंचावता आला नाही़ तेई हिने तिला अनेक चुका करण्यास भाग पाडले आणि हा गेम २१-९ ने एकतर्फी जिंकून सामन्यात बाजी मारली आणि फायनलमध्ये प्रवेश केला़ (वृत्तसंस्था)