WTA स्पर्धेत सानिया मिर्झा - कॅरा ब्लॅकला विजेतेपद

डब्ल्यूटीए स्पर्धेतील महिला दुहेरीच्या अंतिम फेरीत भारताच्या सानिया मिर्झा आणि झिम्बाब्वेच्या कॅरा ब्लॅकने दिमाखदार विजय मिळवून विश्वविजेतेपदक पटकावले आहे.

ऑनलाइन लोकमत

सिंगापूर, दि. २६ - डब्ल्यूटीए स्पर्धेतील महिला दुहेरीच्या अंतिम फेरीत भारताच्या सानिया मिर्झा आणि झिम्बाब्वेच्या कॅरा ब्लॅकने दिमाखदार विजय मिळवून विश्वविजेतेपदक पटकावले आहे. मिर्झा व ब्लॅक या जोडीने तैपेईच्या सू वेई सेह आणि चीनच्या शूई पेंग यांचा ६-१. ६-० असा पराभव केला.

सिंगापूरमध्ये सुरु असलेल्या महिला टेनिस असोसिएशनच्या (डब्ल्यूटीए) विश्व चॅम्पियनशिपमधील महिला दुहेरीत रविवारी सानिया मिझा - कॅरा ब्लॅक व सू वेई सेई - शूई पेंग या जोडीत अंतिम सामना रंगला. ५९ मिनीटे चाललेल्या या सामन्यात मिर्झा - कॅरा या जोडीचेच वर्चस्व दिसत होते. विरोधी दुकलीला फक्त एकाच गेममध्ये विजय मिळवता आला. मात्र यानंतर सानिया - कॅरा या जोडीने त्यांना संधीच दिली नाही व ६-१ व ६-० ने त्यांना धूळ चारली. सानिया - कॅरा या जोडीचे महिला दुहेरीतील हे पाचवे विजेतेपद आहे. सानिया - कॅरा या जोडीचा हा शेवटचा सामना होता. यानंतर सानिया व कॅरा एकत्र खेळणार नाही. सानियाने पुढीलवर्षीपासून तैपेईच्या सू वेई सेईसोबत खेळण्याचा निर्णय घेतला आहे.