सतीश मालुसरे चॅम्पियन

हौशी शरीरसौष्ठव सेवा संस्था, मुंबई उपनगर यांच्या विद्यमाने मुंबईत प्रथमच आयोजित करण्यात आलेल्या एचएस-४ बॉडीबिल्डिंग

मुंबई : हौशी शरीरसौष्ठव सेवा संस्था, मुंबई उपनगर यांच्या विद्यमाने मुंबईत प्रथमच आयोजित करण्यात आलेल्या एचएस-४ बॉडीबिल्डिंग लीगमधील अंतिम टप्प्यात शॉर्ट गु्रपमधील सतीश मालुसरेने बाजी मारून ‘चॅम्पियन आॅफ चॅम्पियन्स’ किताब पटकाविला. त्याला १ लाख रुपयांचा धनादेश आणि आकर्षक चषक देऊन गौरविण्यात आले. या चौथ्या टप्प्यात मात्र किताबाचा मानकरी ठरला तो अंकुश तेरवणकर, तर बेस्ट पोझर म्हणून शेवटच्या या टप्प्यात सतीश मालुसरे सरस ठरला.
चार टप्प्यांत झालेल्या या स्पर्धेमध्ये सतीश मालुसरेने सर्वाधिक ४३ गुण मिळवून प्रथम क्रमांकाचा मान मिळवला. विशेष म्हणजे त्याने चारही टप्प्यांत आपल्या गटात अव्वल क्रमांक पटकावला; तर चेंबूर येथील तिसऱ्या टप्प्यात तो किताबाचा मानकरी होता. अंकुश तेरवणकरचा दुसरा, नरेंद्र राठोडचा तिसरा, विनायक घडसेचा चौथा आणि सुजन पिळणकरचा पाचवा क्रमांक लागला. चार टप्प्यांतील प्रथम १३ क्रमांक मिळविणाऱ्या खेळाडूंना रोख रकमेची पारितोषिके देऊन गौरविण्यात आले. तीन टप्प्यांनंतर दुसऱ्या क्रमांकावर असलेला छत्रपती शिवाजी व्यायाम मंदिराचा सुजन पिळणकर शेवटच्या टप्प्यात सहभागी झाला नाही.