VIDEO-मुंबईचा नयन ठरला स्पीडस्टार

राष्ट्रीय कार्टिंग चॅम्पियनशीपमध्ये वरिष्ठ गटात मुंबईच्या नयन चॅटर्जीने चमकदार कामगिरी करीत बाजी मारली.

ऑनलाइन लोकमत
कोल्हापूर, दि. 21 - पावसाचा शिडकावा.. मध्येच सूर्यनारायणाचे दर्शन... प्रेक्षकांच्या जोरदार टाळ्या आणि प्रोत्साहन अशा उत्साही वातावरणात रंगलेल्या राष्ट्रीय कार्टिंग चॅम्पियनशीपमध्ये वरिष्ठ गटात मुंबईच्या नयन चॅटर्जीने चमकदार कामगिरी करीत बाजी मारली. ‘लोकल बॉय’ चित्तेश मंडोडीने अनपेक्षितपणे दुसरे स्थान काबिज करुन कोल्हापूरकरांना जल्लोष करण्याची संधी दिली. याचबरोबर ज्युनिअर गटात यश आराध्य याने तर मायक्रो गटात अर्जुन नायर विजेते ठरले.
कोल्हापूरजवळील हुपरी रोडवरील मोहितेज रेसिंग अ‍ॅकडमीच्या ट्रॅकवर १३ व्या जे. के. टायर-एफएमएसीआय राष्ट्रीय रोटेक्स मॅक्स चॅम्पियनशीपची रविवारी अंतिम फेरी पार पडली. या फेरीचे वैशिष्ट्ये म्हणजे गेल्या तीन फेरीचा विजेता रिकी डॉनीसन त्याला टक्कर देणारा कोल्हापूरचा ध्रुव मोहिते हे कारमध्ये झालेल्या बिघाडामुळे शर्यत पूर्ण करु शकले नाहीत.
सिनिअर गटात सहाव्या स्थानावरुन सुरवात करणाऱ्या नयन चॅटर्जीने पहिल्यापासूनच आघाडी घेतली. पाचव्या लॅपपर्यंत तो पुढे होता. त्यानंतर थोडा मागे पडला, पण लगेच त्याने लगेच परिस्थितीवर नियंत्रण मिळवले शेवटी त्याने २0 मिनिटे ३४.८४२ सेकंदाची वेळ नोदवून पहिला क्रमांक मिळवला.
कोल्हापूरच्या ध्रुव मोहितेने थोड्या वेळासाठी आकाशला मागे टाकत आघाडी घेतली तेव्हा प्रेक्षकांनी जल्लोष केला. परंतु नयनने पुन्हा त्याला मागे टाकले. ध्रुव मागे पडू लागला. १२ व्या लॅपनंतर तो बाहेर पडला. ध्रुवने निराशा केली असली तरी चित्तेश मंडोडीने कोल्हापूरकरांना जल्लोषाची संधी दिली. जवळजवळ दोन वर्षानंतर ट्रॅकवर पुनरागमन करणाऱ्या चित्तेशने जबरदस्त कामगिरी करुन दुसरे स्थान पटकावले. त्याने २0 मिनिटे ४0.४९४ सेकंदाची वेळ नोंदवली. २0 मिनिटे ४५.४0३ सेकंदाची वेळ नोंदवणारा आकाश गौडा तिसऱ्या स्थानावर राहिला.
जुनिअर मॅक्स गटात बेंगळूरचे वर्चस्व राहिले. यश आराध्य याने पहिल्या क्रमांकावर कब्जा मिळवला. चिराग घोरपडे दुसऱ्या स्थानावर तर पॉल फ्रान्सिस तिसऱ्या स्थानावर राहिला. या गटात आतापर्यंतच्या तिन्ही फेऱ्यातही आघाडी घेतलेल्या मानव शर्माला आजच्या चौथ्या फेरीत अपयश आले असले तरी त्याच्या एकूण गुणसंख्येत फरक पडलेला नाही.
मायक्रो गटात आग्य्राचा शाहान अली आघाडीवर होता, परंतु पाऊस आल्यानंतर मात्र त्याचा वेग मंदावला. याचा फायदा घेत बंगळूरुच्या अर्जुन नायरने पहिले स्थान मिळवले. या गटात बंगळूरुचाच यश मोरे तिसऱ्या स्थानावर राहिला.
विजेत्यांना आण्णासाहेब मोहिते, शिवाजी आणि मोनिका मोहिते, अभिषेक आणि रिधिमा मोहिते यांच्याहस्ते पारितोषिक वितरण करण्यात आले.

रिकी दुसऱ्या स्थानावर घसरला
या वर्षीच्या तिन्ही फेऱ्या जिंकणारा रिकी डॉनिसन हा या फेरीतही विजेतेपदाचा प्रबळ दावेदार समजला जात होता. पण रेसच्यावेळेस वरुन पडणारा पाउस आणि त्यामुळे ओला झालेला ट्रॅक याचा त्याच्या कामगिरीवर परिणाम झाला. त्याच्या कार्टमध्ये बिघाड झाल्याने तो बाजूला झाला, काही वेळानंतर दुसऱ्या कारसह तो पुन्हा रेसमध्ये आला परंतु तोपर्यंत संयोजकांनी त्याला अयोग्य घोषित केले होते. या फेरीत त्याला केवळ ३८ गुणांवर समाधान मानावे लागले. आता तो एकूण ३२४ गुणांसह दुसऱ्या स्थानावर घसरला आहे.