कोण जाणार अंतिम फेरीत?

वानखेडे स्टेडियमवर मंगळवारी होणाऱ्या पहिल्या क्वालिफायर सामन्यात बाजी मारत थेट अंतिम फेरी गाठण्यासाठी अव्वल स्थानी असलेला मुंबई इंडियन्स आणि दुसऱ्या क्रमांकावरील रायझिंग पुणे सुपरजायंट

लोकमत न्यूज नेटवर्क
मुंबई : वानखेडे स्टेडियमवर मंगळवारी होणाऱ्या पहिल्या क्वालिफायर सामन्यात बाजी मारत थेट अंतिम फेरी गाठण्यासाठी अव्वल स्थानी असलेला मुंबई इंडियन्स आणि दुसऱ्या क्रमांकावरील रायझिंग पुणे सुपरजायंट यांच्यात काँटे की टक्कर पाहायला मिळेल. त्याचवेळी, यंदाच्या सत्रात सर्वच संघांवर भारी पडलेल्या मुंबईकरांना पुणेकरांनी दोन वेळा नमवले आहे. त्यामुळे या दोन्ही पराभवाचे उट्टे काढण्यासाठी मुंबईकर उत्सुक असतील. तसेच, पुण्याकडे मुंबईला दोन वेळा नमवल्याचा आत्मविश्वास असल्याने ते याच कामगिरीची पुनरावृत्ती करून अंतिम फेरी गाठण्याचा प्रयत्न करतील.
मुंबईने आपल्या अखेरच्या सामन्यात कोलकाता नाइट रायडर्सला नमवून अग्रस्थान निश्चित केले. विशेष म्हणजे, या सामन्यात मुंबईने आपल्या प्रमुख खेळाडूंना विश्रांती देत, राखीव खेळाडूंना संधी देत आपली बेंच स्टे्रंथ किती मजबूत आहे, हे दाखवले होते. त्यामुळे पुणेकरांना गाफिल राहून चालणार नाही. मुंबई-पुणे यांच्यातील विजेता संघ थेट अंतिम फेरीत पोहोचेल, तर पराभूत संघ हैदराबाद - कोलकाता यांच्यातील विजेत्या संघाविरुद्ध अंतिम फेरीसाठी लढेल. यंदा जबरदस्त फॉर्ममध्ये असलेल्या मुंबईला केवळ पुण्याने दोन वेळा नमवले. मुंबईने एकूण चार पराभव पत्करले असून त्यापैकी दोन पराभव पुण्याविरुद्ध आहेत. मुंबईची फलंदाजी मजबूत असून त्या जोरावर त्यांनी अनेक सामने जिंकले आहेत. इंग्लंडचा आक्रमक फलंदाज जोस बटलर मायदेशी परतल्यानंतर वेस्ट इंडिजचा लेंडल सिमन्सने आपली उपयुक्तता सिद्ध करताना मुंबईला आक्रमक सुरुवात करून देण्याची जबाबदारी यशस्वीपणे सांभाळली. तसेच, नितीश राणा, किरॉन पोलार्ड, पार्थिव पटेल आणि रोहित शर्मा यांच्यामुळे मुंबईच्या फलंदाजीला बळकटी आली आहे. त्याचबरोबर हार्दिक - कृणाल ही पांड्याबंधूंची अष्टपैलू जोडीही निर्णायक ठरत आहे.
वानखेडेची खेळपट्टी फलंदाजांसाठी पूरक असल्याने पुन्हा एकदा येथे धावांचा पाऊस पडू शकतो. मुंबईची सुरुवात सिमन्स - पार्थिव करतील. तर, तिसऱ्या स्थानी नितीश राणाच्या जागी अंबाती रायुडूला खेळविण्यात येऊ
शकते. त्याचवेळी, गोलंदाजांना अधिक
मेहनत घ्यावी लागेल. पंजाबविरुद्ध सुमार मारा केलेल्या मुंबईच्या गोलंदाजांनी २०० हून अधिक धावांची खैरात केली होती. नव्या चेंडूने लसिथ मलिंगा आणि मिशेल मॅक्लेनघन सुरुवात करतील. तसेच, डेथ ओव्हर्समध्ये जसप्रीत बुमराहच्या रुपाने मुंबईकडे मुख्य अस्त्र आहे. शिवाय हार्दिकची त्याला मदत होईल. फिरकीची भिस्त अनुभवी हरभजन सिंग, कृणाल पांड्यावर असेल.
दुसरीकडे, पुणेकरांनी पंजाबचा अक्षरश: फडशा पाडून दुसरे स्थान पटकावले. पुण्याची गोलंदाजी जबरदस्त मजबूत असून मूळचा मुंबईकर असलेला शार्दुल ठाकूर त्यांच्यासाठी ट्रम्प कार्ड ठरू शकतो. वानखेडेची खेळपट्टी चांगल्या प्रकारे ओळखून असलेला शार्दुल मुंबई इंडियन्ससाठी धोकादायक असेल. शिवाय सलामीवीर अजिंक्य रहाणे हादेखील मुंबईकर असल्याने वानखेडेच्या खेळपट्टीतला उसळीपणा तो चांगल्या प्रकारे जाणून आहे. त्यामुळे हे दोन ‘मुंबईकर’ मुंबई इंडियन्ससाठी डोकेदुखी ठरू शकतात.


यातून निवडणार संघ
रायझिंग पुणे सुपरजायंट : स्टिव्ह स्मिथ (कर्णधार), अजिंक्य रहाणे, महेंद्रसिंह धोनी, अशोक दिंडा, मयांक अग्रवाल, अंकित शर्मा, बाबा अपराजित, अंकुश बैन्स, रजत भाटिया, दीपक चहर, राहुल चहर, डॅन ख्रिस्टियन, लोकी फर्ग्युसन, जसकरण सिंग, उस्मान ख्वाजा, सौरभ कुमार, वॉशिंग्टन सुंदर, मिलिंद टंडन, मनोज तिवारी, अ‍ॅडम झम्पा, जयदेव उनाडकट, इश्वर पांडे, राहुल त्रिपाठी आणि शार्दुल ठाकूर.

मुंबई इंडियन्स : रोहित शर्मा (कर्णधार), जसप्रीत बुमराह, श्रेयस गोपाळ, कृष्णप्पा गोथाम, एसेला गुणरत्ने, हरभजन सिंग, मिशेल जॉन्सन, कुलवंत के., सिद्धेश लाड, मिशेल मॅक्लेनघन, लसिथ मलिंगा, हार्दिक पांड्या, कृणाल पांड्या, पार्थिव पटेल, किरॉन पोलार्ड, निकोलस पुरान, दीपक पुनिया, नितीश राणा, अंबाती रायुडू, जितेश शर्मा, कर्ण शर्मा, लेंडल सिमन्स, टीम साऊदी, जगदीश सुचिथ, सौरभ तिवारी आणि विनयकुमार.