दक्षिणेचे आव्हान टिकणार?

मुश्ताक अली टी२० स्पर्धेतील आपले आव्हान कायम राखण्यासाठी विजय आवश्यक असलेले दक्षिण विभाग संघ बुधवारी मुंबईमध्ये

मुंबई : मुश्ताक अली टी२० स्पर्धेतील आपले आव्हान कायम राखण्यासाठी विजय आवश्यक असलेले दक्षिण विभाग संघ बुधवारी मुंबईमध्ये गुणतालिकेत अव्वलस्थानी असलेल्या पूर्व विभागाविरुध्द लढेल. यामध्ये बाजी मारत चार गुणांसह स्पर्धेतील आव्हान कायम राखण्याचे आव्हान दक्षिण विभागापुढे असेल.
स्पर्धेत दक्षिण विभागाच्या नावावर अद्याप एकाही गुणाची नोंद झालेली नाही. त्याचवेळी, दुसऱ्या व तिसऱ्या स्थानी असलेल्या अनुक्रमे मध्य आणि उत्तर विभागाचा सामना दुपारी याच मैदानावर होईल.
याआधी झालेल्या सामन्यात दक्षिण विभागाची गोलंदाजी पूर्व विभागाविरुध्द सपशेल अपयशी ठरली होती. त्यामुळे, बुधवारी पूर्व विभागाविरुध्द कामगिरी उंचावण्याचे दडपण दक्षिणच्या गोलंदाजांवर असेल. दरम्यान, चार संघांमध्ये पूर्व विभागाची धावगती सर्वश्रेष्ठ आहे. पूर्व विभागाने दोन सामन्यांमध्ये एक विजय व एक पराभव अशी कामगिरी केली आहे. दक्षिण विभाग १६ फेब्रुवारी यजमान व बलाढ्य पश्चिम विभागाविरुध्द भिडेल. त्याचवेळी, याचदिवशी दुसरा सामना उत्तर आणि पूर्व विभाग यांच्यामध्ये होईल. तसेच, १७ फेब्रुवारीला आणखी एका विश्रांतीनंतर, स्पर्धेच्या अंतिम दिवशी सकाळी पश्चिम विभागाचा सामना पूर्व विभागाविरुध्द होईल, तर अंतिम राऊंड रॉबिन सामना दक्षिण वि. मध्य असा रंगेल. (क्रीडा प्रतिनिधी)