युवा राष्ट्रकुल : भारतीय खेळाडूंची लक्षवेधी कामगिरी

युवा राष्ट्रकुल स्पर्धेत पहिल्यांदाच समाविष्ट करण्यात आलेल्या ज्युडो स्पर्धेत भारतीयांनी चमकदार कामगिरी करताना एक सुवर्ण आणि ३ कांस्यपदकांची कमाई केली.

नवी दिल्ली : युवा राष्ट्रकुल स्पर्धेत पहिल्यांदाच समाविष्ट करण्यात आलेल्या ज्युडो स्पर्धेत भारतीयांनी चमकदार कामगिरी करताना एक सुवर्ण आणि ३ कांस्यपदकांची कमाई केली.
हरियाणाच्या सोनीने ७३ किलो वजनी गटात एकहाती वर्चस्व राखताना आॅस्टे्रलियाच्या निकोलिच उरोसला नमवले. अंतिम सामन्यात सोनीने निकोलिचला १-० असे पराभूत करत सुवर्णपदकावर नाव कोरले. दुसरीकडे, आशिषने जेन प्रोसेर हॅरी याला १०-० असे लोळवून कांस्यपदकाची कमाई करताना शानदार कामगिरी केली. आशिषच्या दमदार खेळापुढे हॅरीलने सपशेल नांगी टाकली.
मुलींच्या गटात मध्य प्रदेशच्या अंतिम यादवनेही आपली चमक दाखवताना ४८ किलोगटात रेपचेसमध्ये बहामासच्या रसेल जास्मिनला २-० असा धक्का देत कांस्य पटकावले. अन्य एका लढतीत मणिपूरच्या रेबिना देवीने ५७ किलो वजनीगटात कांस्यपदकावर कब्जा केला. दरम्यान, युवा राष्ट्रकुलमध्ये नव्याने समाविष्ट करण्यात आलेल्या ज्युडो खेळामध्ये भारताने ४ पदकांची कमाई करताना अभिमानास्पद कामगिरी केली. (वृत्तसंस्था)