टच स्क्रीनची काळजी कशी घ्याल

- अनिल भापकर

आजचा जमाना टचस्क्रीनचा आहे. स्मार्टफोन तर टचस्क्रीनचे आहेतच पण आजकाल कॉम्प्युटर, लॅपटॉप, टॅब्लेट हेसुद्धा टचस्क्रीनचे यायला लागलेत. टचस्क्रीन मोबाइल हे इतर फिजिकल किबोर्ड मोबाइलपेक्षा वापरायला सोपे आणि फास्ट असतात. हल्लीच्या विविध डिक्शनरी अँपमुळे, मोबाइलच्या ऑपरेटिंग सिस्टिममध्ये असणार्‍या डिक्शनरीमुळे टचस्क्रीनचा टायपिंग स्पीड हा जास्त असतो. त्याचप्रमाणे टचस्क्रीनमुळे स्मार्टफोनचा स्क्रीन साइजदेखील वाढली आहे. कारण पूर्वी मोबाइलचा खालचा अर्धा भाग हा  किबोर्डसाठी असायचा आता टचस्क्रीनमुळे  मोबाइलचा पूर्ण भाग हा स्क्रीन म्हणून वापरता येतो.

एकेकाळी टचस्क्रीन मोबाइल नको रे बाबा म्हणणारेदेखील आजकाल सर्रास टचस्क्रीन मोबाइल आनंदाने वापरताना दिसत आहेत. अगदी दोन-अडीच हजारांपासूनसुद्धा टचस्क्रीन मोबाइल बाजारात उपलब्ध आहेत. त्यामुळे टचस्क्रीन मोबाइल वापरण्याची संख्या ही सर्वाधिक आहे. त्यामुळे मोबाइलच्या टचस्क्रीनची काळजी कशी घ्यायला हवी हेही माहिती असायला हवे.

टचस्क्रीन? एवढं कराच.

१) नखाचा वापर करू नका

आपल्यापैकी अनेकांना मोबाइल वापरताना नखाने टचस्क्रीन वापरायाची सवय असते. टचस्क्रीन  हे बोटांसाठी बनविलेले आहे त्यामुळे नखांचा वापर हा टचस्क्रीनवर व्हायलाच नको. त्यामुळे टचस्क्रीन खराब होऊ शकतो. 

 

२) हळूच टच करा

अनेकांना टचस्क्रीनचा अर्थच कळलेला नसतो. ते मोबाइल स्क्रीनचा वापर टचस्क्रीन म्हणून न करता प्रेसस्क्रीन म्हणून करतात. टचस्क्रीनवर अगदी हलक्या हाताने बोटांचा फक्त स्पर्श करायचा असतो; मात्र ही मंडळी एवढय़ा जोरात टचस्क्रीन प्रेस करतात की, त्यामुळे अनेकांचे टचस्क्रीन खराबदेखील झाले आहेत. त्यामुळे टचस्क्रीनला कधीही जोराने प्रेस करून वापरू नका. अगदी आल्हाद स्पर्श केला तरी टचस्क्रीन काम करतो.

३) सूर्यकिरणांचा संपर्क टाळा

टचस्क्रीन मोबाइल स्क्रीन जास्त वेळ सूर्यकिरणांच्या संपर्कात येऊ देऊ नका. कारण टचस्क्रीन तंत्रज्ञानामध्ये पातळ लिक्विडचा लेअर असतो. डायरेक्ट सूर्यकिरणांच्या जास्तवेळ संपर्काने तुमचा टचस्क्रीन खराब होऊ शोकतो. त्यामुळे चारचाकी गाडीमध्ये प्रवास करताना मोबाइल ज्या ज्या दिशेने ऊन येते त्या ठिकाणी ठेऊ नका.

 

४) छोटा कपडा नेहमी जवळ बाळगा

टचस्क्रीन व्यवस्थित काम करण्यासाठी तो स्वच्छ असणे गरजेचे असते. धूळ किंवा इतर काही कारणाने टचस्क्रीन अस्वच्छ झाला असल्यास त्याला त्वरित चांगल्या स्वच्छ कपड्याने पुसून घ्या. त्यासाठी मऊ, स्वच्छ कपडा नेहमी जवळ ठेवा, तसेच दिवसातून दोन-तीन वेळेस टचस्क्रीन साफ करण्याची सवय लावून घ्या.

 

5) मोबाइल कव्हर वापरा

टचस्क्रीन मोबाइल असेल तर अशा मोबाइलला कव्हर लावून वापरा. कारण अनेकांना मोबाइल खिशात ठेवायची सवय असते. खिशात जर आणखी काही वस्तू असतील जसे की किचन, क्वाइन त्यामुळे टचस्क्रीन खराब होऊ शकतो. आजकाल अनेक कंपन्यांच्या मोबाइलसोबत फ्लिपकव्हर येतेच; मात्र नाही आल्यास विकत घेऊन फ्लिपकव्हर लावा. कारण त्यामुळे जेव्हा जेव्हा आपण मोबाइल हातात पकडतो त्याचा दबावही टचस्क्रीवर येत नाही. 

6) स्क्रीनगार्ड 

नवीन स्मार्टफोन विकत घेतला की लगेच दुकानदाराकडून स्क्रीनगार्डची मागणी करा. (विकत घ्या) कारण स्क्रीनगार्डमुळे टचस्क्रीनचे लाइफ वाढण्यास मदत होते. हल्ली अनेक महागड्या स्मार्टफोनचे टचस्क्रीन हे स्क्रॅचप्रुफ असतात त्यामुळे त्यांनी स्क्रीनगार्ड नाही वापरले तरी चालते.