दुचाकी- टेम्पोच्या समोरासमोर धडकेत २० वर्षीय तरुणाचा जागीच मृत्यू

पाथरी-आष्टी रस्त्यावर वरखेड पाटीजवळ झाला अपघात

पाथरी:  पाथरी-आष्टी रस्त्यावर वरखेड पाटीजवळ टेम्पो आणि दुचाकीच्या समोरासमोर झालेल्या अपघातात २० वर्षीय दुचाकीस्वाराचा जागीच मृत्यू झाला. अक्षय रामेश्वर गिरी असे मृताचे नाव आहे. हा अपघात आज दुपारी 3 च्या सुमारास झाला.

राजेगाव ( ता. घनसावंगी) येथील तरुण अक्षय रामेश्वर गिरी हा दुचाकीवरून पाथरी येथून गावाकडे जात होता. पाथरी-आष्टी रस्त्यावर वरखेड पाटीजवळ त्याच्या दुचाकीची समोरून येणाऱ्या टेम्पोसोबत (  क्र एम एच 26 बी इ 4775)  सामोरासमोर जोरदार धडक झाली. या अपघातात दुचाकीवरील अक्षयचा जागीच मृत्यू झाला. घटनास्थळी दाखल होत पोलिसांनी मृतदेह पाथरी येथील रुग्णालयात दाखल केला असून पुढील कारवाई सुरु आहे.