चार एकरवरील ऊस जळून खाक

पाथरी : तालुक्यातील बाभळगाव शिवारामध्ये विद्युत प्रवाहित तारांच्या घर्षणातून लागलेल्या आगीमध्ये एका शेतकऱ्याचा ४ एकरवरील ऊस ठिबक सिंचनासह जळून खाक झाल्याची घटना गुरुवारी सायंकाळी घडली. पाथरी तालुक्यातील बाभळगाव येथील शेतकरी माणिक मदन गिराम यांची गट क्रमांक ९ मध्ये शेती आहे. त्यात त्यांनी मागील हंगामात उसाची लागवड केली होती. ३१ डिसेंबर रोजी सायंकाळी ४.३० वाजेच्या सुमारास त्यातील ४ एकर उसाच्या क्षेत्रावर विद्युत प्रवाहित तारांच्या घर्षणामुळे आग लागली. यामध्ये गिराम यांनी उसाला पाणी देण्यासाठी अंथरलेली पाइपलाइन व शेजारी ठेवलेले ठिबक सिंचन जळून खाक झाले. यामध्ये गिराम यांचे ३ ते ४ लाख रुपयांचे नुकसान झाले आहे. दरम्यान, तालुक्यातील अनेक गावांमध्ये महावितरणच्या विद्युत तारांच्या घर्षणामुळे महिनाभरात ५ ते ६ शेतकऱ्यांचा ऊस जळून खाक झाल्याच्या घटना घडल्या आहेत, तरीही याकडे महावितरण कंपनीचे दुर्लक्ष होत आहे.