जिल्ह्यात कोरोना वाढला; सॅनिटायझरचा वापर मात्र घटला!

लोकमत न्यूज नेटवर्क

परभणी : मागच्या एक महिन्यापासून कोरोनाचा संसर्ग वाढला असला तरी जिल्ह्याच्या बाजारपेठेत सॅनिटायझरच्या मागणीला उठाव आलेला नाही. सॅनिटायझरचा वापर लक्षणीयरित्या कमी झाला असून, ही बेफिकिरी संसर्ग वाढविण्यासाठी धोकादायक ठरु शकते.

मागील वर्षी कोरोनाच्या संसर्ग काळात सॅनिटायझरला मोठी मागणी होती. बाजारपेठेत सॅनिटायझरचा तुटवडा निर्माण होण्यापर्यंत स्थिती निर्माण झाली. मात्र कोरोनाच्या दुसऱ्या टप्प्यात नागरिकांचा बेफिकिरीपणा वाढला आहे. सॅनिटायझरचा वापर करणाऱ्या नागरिकांची संख्या क्वचितच दिसून येत आहे. बाजारपेठेत वेगवेगळ्या कंपन्यांची आणि माफक दरातील सॅनिटायझर्स उपलब्ध आहेत. मात्र या सॅनिटायझरला फारशी मागणी नाही. त्यामुळे स्वच्छतेच्या दृष्टीने प्रत्येक २० मिनिटांना हात धुण्याच्या केलेल्या आवाहनाचे किती जण पालन करतात? हाही प्रश्न निर्माण होत आहे. काहीही असले तरी नागरिकांनी नियम पाळले नाही तर त्यांचा धोका वाढू शकतो. त्यामुळे आता त्यांनाच निर्णय घ्यायचा आहे.

मागील वर्षी कोरोनाचा संसर्ग वाढला होता. त्यावेळी दुकानदारांकडे स्टॉक शिल्लक राहणार नाही, एवढ्या मोठ्या प्रमाणात सॅनिटायझरची विक्री झाली होती. मागणी मोठ्या प्रमाणात होती.

विशेष म्हणजे ठराविक कंपनीचे सॅनिटायझर मिळविण्यासाठी अनेक जण शहरात विविध दुकाने फिरून ते सॅनिटायझर मिळवित होते. आता तेच सॅनिटायझर सर्वत्र उपलब्ध असताना मागणी नाही.

मागील वर्षाच्या तुलनेत यावर्षी ९० टक्क्यांनी सॅनिटायझरची मागणी घटली आहे. औषधी दुकानांमध्ये सॅनिटायझरचा मोठ्या प्रमाणात साठा आहे; मात्र त्यास ग्राहकांची मागणी नाही.

जिल्ह्यात कोरोनाचा संसर्ग वाढला असला तरी नागरिक प्रतिबंधक नियमांचे पालन करीत नाहीत. त्यामुळे हा प्रकार वाढला आहे. धोका टाळण्यासाठी सॅनिटायझर वापर करणे आवश्यक आहे.

मागील वर्षीच्या तुलनेत यावर्षी निश्चितच सॅनिटायझरची विक्री घटली आहे. बाजारात मुबलक प्रमाणात सॅनिटायझर उपलब्ध आहे. उच्चशिक्षित वर्ग आजही सॅनिटायझरचा वापर करतो. इतर काही जण साबणाने हात धूत असतील, असे गृहीत धरता येईल. सॅनिटायझरची मागणी घटली आहे.

सूर्यकांत हाके,

केमिस्ट ॲण्ड ड्रगिस्ट असो.