मळणी यंत्रात रुमाल अडकल्याने बसला गळफास; शेतकऱ्याचा जागीच मृत्यू 

शेतात सुरू होती सोयाबीन काढणी

सोनपेठ : तालुक्यातील नैकोटा येथे सोयाबीनची काढणी चालू असतानाच मळणी यंत्रात गळ्यातील रुमाल अडकून गळफास बसल्याने शेतकऱ्याचा जागीच मृत्यू झाल्याची घटना आज सकाळी घडली.बालासाहेब साठे असे मृत शेतकाऱ्याचे नाव आहे.

शेतकरी बालासाहेब साठे सकाळी सोनपेठ येथून त्यांच्या नेकोटा येथील शेतात आले.शेतात हारवेस्टरद्वारे सोयाबीन काढणी सुरू होती. यावेळी हारवेस्टरवर चढून साठे पाहणी करत होते. अचानक गळ्यातील रुमाल हारवेस्टरच्या पंख्यात अडकल्याने साठे यांचा गळा आवळला गेला. यावेळी चालकाचेही लक्ष गेले नाही. दरम्यान, काही कळायच्या आत साठे बेशुध्द अवस्थेत हारवेस्टरवरती पडलेले दिसले. त्यांना तत्काळ गंगाखेड येथे उपचारासाठी नेण्यात आले. येथे डॉक्टरांनी तपासून त्यांना मृत घोषीत केले. त्यांच्या पश्चात आई, पत्नी,एक मुलगी एक मुलगा असा परिवार आहे.