दमदार पावसाने ओढ्यांना पूर

परभणी : जिल्ह्यात चार दिवसांपासून पाऊस होत आहे. रविवारी परभणी शहर आणि परिसरात दिवसभर दमदार पाऊस बरसला. या पावसामुळे तालुक्यातील ओढ्यांना प्रथमच पूर आला आहे.

चार दिवसांपूर्वी पाऊस नसल्याने जिल्ह्यातील शेतकरी चिंतेत होते. खरीप हंगामातील कापूस आणि सोयाबीन ही पिके हातची जाण्याची चिन्हे निर्माण झाली होती. मात्र, ऐनवेळी पावसाचे पुनरागमन झाले आहे. तब्बल पंधरा दिवसांनंतर जिल्ह्यात पाऊस दाखल झाला असून, दररोज पाऊस होत आहे. शनिवारी परभणी शहर आणि परिसरात जोरदार पाऊस झाला. त्यानंतर रविवारी देखील सकाळपासूनच ढगाळ वातावरण होते. पावसाची रिपरिपही सुरू होती. दुपारी दोन वाजण्याच्या सुमारास पावसाने जोर धरला. दोन तास मध्यम स्वरूपाचा पाऊस झाला. त्यानंतर सायंकाळी सात वाजेपर्यंत शहर आणि परिसरामध्ये पावसाची रिपरिप सुरूच होती. अधूनमधून पावसाचा जोर वाढत होता. या पावसामुळे शहरातील सखल भागांमध्ये पाणीच पाणी झाले आहे.

परभणी तालुक्यात पावसाचा जोर अधिक असल्याने तालुक्यातील ओढे, नाल्यांना पूर स्थिती निर्माण झाली. परभणी- सायाळा या मार्गावरील ओढ्याला पूर आल्याने या मार्गावरील वाहतूक ठप्प झाली होती. तसेच शहरातही अनेक रस्त्यांवर मोठ्या प्रमाणात पाणी साचले होते. त्यामुळे नागरिकांची धांदल उडाली.

रविवार हा सुटीचा दिवस आणि त्यात दिवसभर पावसाची रिपरिप असल्याने शहरातील प्रमुख मार्गावरील वाहतूकही विरळ झाली होती. नागरिकांनी घराबाहेर पडण्याचे टाळले. त्यामुळे शहरातील रस्त्यांवर शुकशुकाट दिसून आला.

दरम्यान, जिल्ह्यात दमदार पाऊस होत असल्याने शेतकरी सुखावले आहेत. खरीप हंगामातील पिकांना या पावसाने जीवदान दिले आहे.