परभणी : युती झाली तरी गंगाखेड-पाथरीत भाजपचीच गोची

भारतीय जनता पार्टी व शिवसेनेची राज्यस्तरावर युती होणार असल्याची चर्चा गेल्या अनेक दिवसांपासून सुरू आहे़ त्यानुसार राज्यात या पक्षांची युती झाली तरी पाथरी व गंगाखेड विधानसभा मतदारसंघात याचा फटका भाजपालाच बसण्याची चर्चा राजकीय वर्तुळात सुरू झाली आहे़

लोकमत न्यूज नेटवर्क
परभणी : भारतीय जनता पार्टी व शिवसेनेची राज्यस्तरावर युती होणार असल्याची चर्चा गेल्या अनेक दिवसांपासून सुरू आहे़ त्यानुसार राज्यात या पक्षांची युती झाली तरी पाथरी व गंगाखेड विधानसभा मतदारसंघात याचा फटका भाजपालाच बसण्याची चर्चा राजकीय वर्तुळात सुरू झाली आहे़
२०१४ च्या विधानसभा निवडणुकीत भाजपा व शिवसेना स्वबळावर लढले होते़ जिल्ह्यात परभणी व जिंतूरमध्ये भाजपाने तर गंगाखेडमध्ये रासपने आणि पाथरीत स्वाभिमानी शेतकरी संघटनेने निवडणूक लढविली होती़ तर शिवसेनेने चारही विधानसभा मतदार संघात निवडणूक लढविली होती़ या निवडणुकीत दोन ठिकाणी भाजपाला एकूण ७२ हजार ३६१ मते मिळाली होती तर शिवसेनेला ४ मतदार संघात एकूण १ लाख ५५ हजार ८६९ मते मिळाली होती़ तर गंगाखेडमध्ये भाजपाचा मित्र पक्ष रासपला ५६ हजार १२६ तर पाथरीत स्वाभिमानीला २ हजार ४०० मते मिळाली होती़ २०१९ च्या निवडणुकीतील चित्र वेगळे असणार आहे़ राज्यस्तरावर शिवसेना-भाजपाची युती होणार असल्याची चर्चा जोरदारपणे सुरू आहे़ असे झाले तर यावेळी जिंतूरमधून माजी आ़ रामप्रसाद बोर्डीकर यांच्या कन्या मेघना बोर्डीकर या भाजपाकडून निवडणूक रिंगणात उतरू शकतात़ या मतदारसंघात शिवसेनेची फारशी ताकद नाही़ शिवाय खा़बंडू जाधव यांचे बोर्डीकर यांच्याशी सख्य असल्याने येथे भाजपाला शिवसेनेची मदत होईल़
पाथरीत मात्र वेगळेच चित्र असेल़ येथे गेल्या वेळी अपक्ष लढलेले मोहन फड हे भाजपाचे उमेदवार असू शकतात़ फड यांनी लोकसभेला खा़ जाधव यांच्या विरोधात उघड काम केल्याने येथे राज्यात जरी शिवसेना-भाजपाची युती झाली तरी शिवसेनेचे कार्यकर्ते आ़ फड यांच्या विरोधात काम करतील़ लोकसभेला मुख्यमंत्री देवेंद्र फडणवीस यांनी पाथरीत खा़ जाधव यांच्या प्रचारार्थ घेतलेल्या प्रचार सभेला आ. फड उपस्थित राहिले आणि दुसऱ्याच दिवशी पुन्हा त्यांनी राष्ट्रवादीचे उमेदवार राजेश विटेकर यांच्यासाठी काम सुरू केले़ त्याचीच पुनरावृत्ती करीत खा़ जाधव हिशोब चुकता करू शकतात़ परिणामी येथे आ़ फड यांचे पाय युतीच्या दृष्टीकोणातून खोलात राहणार आहेत़ शिवाय भाजपाच्या अंतर्गत विरोधकांचाही त्यांना सामना करावा लागणार आहे़ सोनपेठ येथील एका कार्यक्रमात भाजपाचे जिल्हाध्यक्ष अभय चाटे यांचे छायाचित्र उद्घाटन कार्यक्रमाच्या पोस्टरवर ऐनवेळी चिटकविण्यात आले होते, अशी नवीन चर्चा सुरू आता झाली आहे़ प्रत्यक्षात काय स्थिती होती, हे सोनपेठच्या भाजपा कार्यकर्त्यांनाच माहिती आहे; परंतु, हा ही आ़ फड यांच्यासाठी मायनस पॉर्इंट समजला जात आहे़
गंगाखेड विधानसभा मतदार संघ यावेळी रासपकडे राहणार की भाजपकडे हे निश्चित नाही़ रत्नाकर गुट्टे हे जेलमध्ये असल्याने ही जागा भाजपाला मिळावी, यासाठी पक्षाच्या इतर नेत्यांनी आटापिटा चालविला आहे. असे झाले तर तेथेही भाजपाला सेनेचे सहकार्य मिळण्याची शक्यता कमी आहे़ शिवसेनेचे जिल्हाप्रमुख विशाल कदम हेच गंगाखेडमधून निवडणुकीच्या रिंगणात उतरण्याच्या तयारीत आहेत़ शिवाय गेल्या निवडणुकीत येथे शिवसेनेला तब्बल ४१ हजार ९१५ मते मिळाली होती़ आता ही जागा भाजपाकडे गेल्यास शिवसैनिकांच्या नाराजीत भर पडेल़ परिणामी येथेही भाजपाला शिवसेनेचे सहकार्य मिळणे कठीण आहे़ परभणी विधानसभा मतदारसंघात अगोदरच शिवसेना-भाजपात सख्य नाही़ उलट या दोन पक्षात येथे कमालीची स्पर्धा आहे़ परिणामी शिवसेनेच्या विरोधात येथे भाजपाचा एक गट सक्रिय राहणार याची जाण आ़ डॉ़ राहुल पाटील यांना आहे़ त्यामुळे त्यांनी भाजपाच्या दुसºया गटाला आणि राष्ट्रीय स्वयंसेवक संघातील जुन्या कार्यकर्त्यांना विश्वासात घेवून निवडणूक लढविण्याची तयारी सुरू केली आहे़
भाजपाच्या मित्र पक्षांची ओढाताण
४राज्यात रिपब्लिकन पार्टी आॅफ इंडियाचा आठवले गट, विनायक मेटे यांचा शिवसंग्राम पक्ष आणि महादेव जानकर यांचा राष्ट्रीय समाज पक्ष भाजपाचे मित्र पक्ष आहेत़ जिल्ह्यात शिवसंग्राम वगळता रिपाइं आठवले गट आणि राष्ट्रीय समाज पक्षाकडून जागांची मागणी केली जात आहे़ त्यामध्ये रिपाइं आठवले गटाने गंगाखेडची मागणी केली असून, याच जागेवर रासपचाही दावा आहे़ या मित्र पक्षांनी आपली मागणी राज्यस्तरावर लावून धरली आहे़ तरीही याबाबत भाजपाकडून भूमिका स्पष्ट करण्यात आलेली नाही़
४त्यामुळे आपल्या पक्षाला ही जागा मिळावी, यासाठी मित्र पक्षांची ओढाताण सुरू आहे़ रिपाइं आठवले गटाकडून डॉ़ सिद्धार्थ भालेराव यांनी उमेदवारी मागितली आहे तर रासपकडून रत्नाकर गुट्टे यांच्यासह अन्य काही नवीन उमेदवारांनी पक्षाकडे उमेदवारी मागितली आहे़