अज्ञात वाहनाच्या धडकेत दुचाकीस्वार जागीच ठार 

परळी रोडवरील बनपिंपळा शिवारातील घटना

गंगाखेड: अज्ञात वाहनाने समोरून दिलेल्या धडकेत एक दुचाकीस्वार जागीच ठार झाल्याची घटना गुरुवारी (दि. २८) सकाळी ९ वाजेच्या सुमारास बनपिंपळा शिवारात घडली आहे. इकबाल अब्बास शेख ( ४४) असे मृताचे नाव असून ते अंबाजोगाई तालुक्यातील साकुड येथील रहिवासी होते.

शहरापासून ६ किलोमीटर अंतरावर असलेल्या बनपिंपळा शिवारातील परळी रोडच्या कडेला एक व्यक्ती जखमी अवस्थेत पडल्याचे तेथील शेतकऱ्याच्या निदर्शनास आले. यावेळी तेथे अपघातग्रस्त दुचाकीही (एम.एच. ४४ ए ६४८८) आढळून आली. शेतकऱ्याने तत्काळ याची माहिती पोलिसांना दिली. यानंतर जमादार टी. टी. शिंदे, प्रवीण कांबळे, रत्नाकर मुरकुटे, गृहरक्षक दलाचे जवान मारोती पांचाळ यांनी घटनास्थळी धाव घेतली. जखमीस तत्काळ अमजद खान पठाण, शेख अल्ताफ, सय्यद अन्सार, खाजगी रुग्णवाहिका चालक रावण भालेराव यांच्या मदतीने उपजिल्हा रुग्णालयात दाखल करण्यात आले. मात्र डॉक्टरांनी त्यांना तपासून मृत घोषित केले. याप्रकरणी मयताचे मोठे भाऊ इखान शेख अब्बास यांनी दिलेल्या फिर्यादीवरून गुन्हा दाखल करण्यात आला आहे. पुढील तपास सपोनि राजेश राठोड हे करीत आहेत.