आठ आरोग्य कर्मचाऱ्यांची पदे रिक्त

पाथरी : तालुक्यातील वाघाळा येथील प्राथमिक आरोग्य केंद्रात आरोग्य परिचारिका, आरोग्यसेवक व शिपाई यांची आठ पदे रिक्त आहेत. त्यामुळे रुग्णसेवा पूर्णपणे कोलमडली आहे. परिणामी, रुग्ण व नातेवाइकांची गैरसोय होत आहे.

पाथरी तालुक्यातील वाघाळा येथील प्राथमिक आरोग्य केंद्रांतर्गत १७ गावांतील २४ हजार ग्रामस्थांचा समावेश आहे. या ग्रामस्थांच्या आरोग्याची काळजी घेण्याची जबाबदारी या प्राथमिक आरोग्य केंद्रासह तुरा व रेणापूर येथील दोन आरोग्य उपकेंद्रांवर आहे. तसेच आता नव्याने मुद्‌गल व देवनांदरा येथे आरोग्य उपकेंद्राची इमारत उभी करण्यात आली आहे. सद्य:स्थितीत ही दोन केंद्रे सुरू होणे बाकी आहे. त्यामुळे वाघाळा येथील आरोग्य केंद्रावर रुग्णसेवेचा मोठा भार आहे. त्यामुळे हे आरोग्य केंद्र औषध, गोळ्यांसह आरोग्य कर्मचाऱ्यांनी परिपूर्ण असणे गरजेचे आहे. मात्र, सद्य:स्थितीत या केंद्राला चार परिचारिकांची आवश्यकता असताना दोन पदे रिक्त आहेत. आरोग्यसेवक २ व शिपायाची ४ अशी एकूण ८ पदे रिक्त आहेत. त्यामुळे येथील प्राथमिक आरोग्य केंद्रात आरोग्य शिबिर, कुटुंब कल्याण शस्त्रक्रिया आदी कार्यक्रम ठप्प झाले आहेत. उपलब्ध डॉक्टर व आरोग्य कर्मचाऱ्यांना तारेवरची कसरत करून रुग्णांवर उपचार करावे लागत आहेत. त्यामुळे रुग्ण व नातेवाइकांमध्ये संताप व्यक्त होत आहे.

रिक्त पदे तत्काळ भरा

वाघाळा येथील प्राथमिक आरोग्य केंद्रात २४ हजार नागरिकांच्या आरोग्याची जबाबदारी असतानाही या ठिकाणी दोन आरोग्य परिचारिका व आरोग्यसेवक व शिपायांची पदे रिक्त असताना रुग्णांना आर्थिक फटका सहन करावा लागत आहे. एकीकडे कोरोनाच्या पार्श्वभूमीवर राज्य शासन आरोग्य यंत्रणा सक्षम करण्यासाठी पावले उचलत असताना दुसरीकडे मात्र प्राथमिक आरोग्य केंद्रातील रिक्त पदांमुळे रुग्णांची गैरसोय होत आहे.