राष्ट्रीय आरोग्य समितीचा दौ-यात माहिती देताना अधिका-यांची धांदल

समितीने रुग्णालयातील प्रत्येक विभागात जाऊन रुग्णालयाने राबविलेल्या कार्यक्रमांची माहिती घेतली. समितीला माहिती देताना अधिकारी- कर्मचा-यांची चांगलीच धांदल उडाल्याचे दिसून आले.

ठळक मुद्देसमितीने जिल्हा सामान्य रुग्णालयातील प्रत्येक विभागाची केली पाहणी समितीमधील अधिका-याने आम्ही रुग्णालय प्रशासनाच्या विरोधात माहिती घेण्यासाठी आलो नाहीत तर पाहणी करण्यासाठी आलो आहोत.

परभणी :  जिल्ह्यातील आरोग्य सेवांचा आढावा घेण्यासाठी राष्ट्रीय  आरोग्य समिती रविवारी जिल्हा दौ-यावर आली असून, दुपारी ३.३० वाजेच्या सुमारास या समितीने जिल्हा सामान्य रुग्णालयाची पाहणी केली. या पाहणीत रुग्णालयातील प्रत्येक विभागात जाऊन रुग्णालयाने राबविलेल्या कार्यक्रमांची माहिती घेतली. समितीला माहिती देताना अधिकारी- कर्मचा-यांची चांगलीच धांदल उडाल्याचे दिसून आले.

केंद्र शासनाच्या आरोग्य विभागाच्या वतीने दरवर्षी राज्यातील दोन जिल्ह्यातील आरोग्य सेवांचा आढावा घेतला जातो. यावर्षी ५ ते ८ नोव्हेंबर या कालावधीत राष्ट्रीय आरोग्य समिती परभणी जिल्ह्यातील आरोग्य सेवांचा आढावा घेत आहे. ही समिती जिल्ह्यातील प्राथमिक आरोग्य केंद्र, उपकेंद्र, ग्रामीण रुग्णालय, उपजिल्हा रुग्णालय, स्त्री रुग्णालय तसेच जिल्हा रुग्णालयाची तपासणी करणार आहे. 

रविवारी सकाळी ११.३० वाजता या समितीचे जिल्ह्यात आगमन झाले. दुपारी ३.३० वाजेच्या सुमारास जिल्हा सामान्य रुग्णालयात ही समिती दाखल झाली. नवीन प्रशासकीय इमारतीत जिल्हा शल्यचिकित्सकांच्या कक्षामध्ये या समितीतील सदस्यांचा सत्कार करण्यात आला. प्रशासकीय इमारतीतील टेलिमेडिसीन कक्षास समितीने भेट दिली. या कक्षातून रुग्णांसाठी राबविल्या जाणा-या  योजनांची व सुविधांची माहिती घेतली. यावेळी कर्मचा-याकडून राष्ट्रीय आरोग्य अभियानांतर्गत राबविण्यात येणा-या योजनांचे सादरीकरण करुन घेतले. समितीला माहिती देताना अधिकारी, कर्मचा-यांची चांगलीच धांदल उडत होती. तब्बल अर्धा तास या कक्षात माहिती घेऊन ही समिती रुग्णालयातील पाकगृह विभागाकडे निघाली.

पाकगृहात दिल्या जाणा-या सुविधांची माहिती कर्मचा-यांनी दिली. त्यानंतर स्त्री रुग्णालयात दिल्या जाणा-या सुविधा, स्वच्छता आदी कामांचा समितीने आढावा घेतला. रात्री उशिरापर्यंत जिल्हा सामान्य रुग्णालयातील प्रत्येक विभागाची माहिती घेण्यात आली.या समितीत केंद्रीय पातळीवरील दहा व विभागीय पातळीवरील दहा अशा २० अधिका-यांचा समावेश आहे. ही समिती ८ नोव्हेंबरपर्यंत  दौ-यावर असून जिल्ह्यातील प्राथमिक आरोग्य केंद्र, उपजिल्हा रुग्णालय, ग्रामीण रुग्णालयाच्या कामकाजाचा आढावा घेणार आहे.

दोन तास बंद दाराआड चर्चा
परभणी- राष्ट्रीय आरोग्य समितीच्या सदस्यांनी रविवारी येथील जिल्हाधिकारी कार्यालयात जिल्ह्यातील आरोग्य विभागातील अधिका-यांसमवेत दोन तास बंद दाराआड चर्चा केली. परभणी जिल्ह्यातील आरोग्य विभागातील कामकाजाचा आढावा घेण्यासाठी केंद्रस्तरीय राष्ट्रीय आरोग्य समिती रविवारी परभणीत दाखल झाली आहे. या समितीमध्ये केंद्रस्तरावरील १० सदस्यांचा समावेश आहे. डॉ.एस.ए. अग्रवाल हे समिती प्रमुख असून डॉ.ज्योती, डॉ.पद्मावती, डॉ.सुशांत अग्रवाल, डॉ.अपर्णा कुल्लू, डॉ. प्रशांत कुमार, डॉ.निताशा कौर, विवेक सिंघल, सत्यजीत साहू, डॉ.अजय प्रकाश हे सदस्य परभणीत दाखल झाले आहेत.

रविवारी दुपारी १२ वाजेच्या सुमारास समितीच्या सदस्यांचे जिल्हाधिकारी कार्यालय आगमन झाले. जिल्हाधिकारी कार्यालयातील सभागृहात आरोग्य विभागाच्या अधिकाºयांसमवेत समितीच्या सदस्यांनी चर्चा केली. यावेळी पत्रकार, छायाचित्रकारांनाही बैठकीत प्रवेश नाकारण्यात आला. दोन तास ही बैठक चालली. यात जिल्ह्यातील आरोग्य केंद्र, रुग्णवाहिका, आरोग्य सेवा अशा विविध विषयांवर समितीच्या पदाधिकाºयांनी अधिकाºयांना प्रश्न विचारुन माहिती घेतली. त्यानंतर जिल्ह्यातील आरोग्य संस्थांना भेटी देण्याचे नियोजनही करण्यात आले. दुपारी २ वाजेनंतर या सदस्यांनी भोजन घेऊन दुपारी ३.३० वाजेच्या सुमारास जिल्हा रुग्णालयाच्या पाहणीला प्रारंभ केला. या बैठकीस जिल्हाधिकारी पी. शिव शंकर, मनपा आयुक्त राहुल रेखावार, जिल्हा शल्यचिकित्सक डॉ.जावेद अथर यांच्यासह आरोग्य विभागातील अधिकारी उपस्थित होते.

समितीच्या दौ-यामुळे रुग्णालय झाले चकाचक
केंद्र शासनाच्या आरोग्य विभागाच्या वतीने जिल्ह्यातील आरोग्य सेवांचा आढावा घेण्यासाठी राष्ट्रीय आरोग्य समिती जिल्हा दौ-यावर येणार असल्याचा कार्यक्रम रुग्णालय प्रशासनाला आला होता. या दौ-याच्या पार्श्वभूमीवर जिल्हा सामान्य रुग्णालय प्रशासन १५ दिवसांपासून तयारीला लागले होते. रुग्णालयाची पाहणी करताना समितीने नाराजी व्यक्त करु नये, यासाठी रुग्णालय परिसरात स्वच्छता, रंगरंगोटी, योजनांच्या माहिती संदर्भातील पोस्टर्स ठिकठिकाणी लावले होते.

तसेच रुग्णालयातील दस्ताऐवज अद्ययावत करुन ठेवले होते. रुग्णालयातील प्रत्येक वार्ड स्वच्छ केला होता. त्यामुळे रविवारी प्रथमच रुग्णालय चकाचक दिसत होते. राष्ट्रीय समितीच्या दौ-यात विचारल्या जाणा-या प्रत्येक योजनेची अद्ययावत माहिती विभागप्रमुखांकडे ठेवण्यात आली होती. त्यामुळे रविवारी रुग्णालय व परिसर समितीसाठी चकाचक करुन ठेवला होता.

आम्ही केवळ पाहणीसाठी आलोत
राष्ट्रीय समिती जिल्हा रुग्णालयातील पाकगृहातील माहिती घेत होती. तेव्हा एका पोलीस अधिका-यांने पत्रकारांना माहिती घेण्यासाठी थांबू द्यायचे का? असा प्रश्न राष्ट्रीय समितीतील पथक प्रमुखास केला. तेव्हा या अधिका-याने आम्ही रुग्णालय प्रशासनाच्या विरोधात माहिती घेण्यासाठी आलो नाहीत तर पाहणी करण्यासाठी आलो आहोत. त्यामुळे आम्हाला आमचे काम करु द्या, असे उत्तर दिले. त्यावर विरोधात नाही तर रुग्णालयाच्या बाजुने आला आहात का? असा प्रश्न पत्रकारांनी केला. तेव्हा मात्र पथकप्रमुख निरुत्तर झाले.