मॉर्निंग वॉक करून परत येताना महिलेचे गंठण लांबविले

आनंद नगर रस्त्याने व्यंकटेश नगरकडे जाणाऱ्या मार्गावर दुचाकीवर आलेल्या दोघांनी पळवले गंठन

परभणी : शहरातील आनंद नगर परिसरात मॉर्निंग वॉक वरून घरी परत येत असताना एका महिलेच्या गळ्यातील तीन तोळ्याचे सोन्याचे गंठण दुचाकीवरून आलेल्या दोन अनोळखी इसमांनी बळजबरीने चोरून लांबविले. हा प्रकार सोमवारी सकाळी सात वाजण्याच्या सुमारास घडला आहे. याप्रकरणी नवा मोंढा ठाण्यात गुन्हा दाखल करण्यात आला आहे.

व्यंकटेश नगर भागातील गृहिणी सुरेखा भगवानराव घुगे यांनी फिर्याद दिली. सोमवारी सकाळी नेहमीप्रमाणे सुरेखा घुगे व त्यांच्या शेजारी राहणाऱ्या सुनीता कातकडे या दोघी मॉर्निंग वॉकसाठी घरातून बाहेर पडल्या. काळी कमान, वसंतराव नाईक विद्यापीठ मार्गे भाजीपाला घेऊन वसमत रोडने आनंद नगरकडे त्या येत होत्या. आनंद नगर रस्त्याने व्यंकटेश नगरकडे जाणाऱ्या मार्गावर जाताना सकाळी सातच्या सुमारास दुचाकीवर दोघेजण त्यांच्यासमोरून आले. दुचाकी हळुवारपणे घेत घुगे यांच्या गळ्यातील सोन्याचे गंठण दुचाकीवर पाठीमागे बसलेल्या इसमाने हिसका मारून तोडले व दोघेही दुचाकीस्वार वसमत रोडकडे पळाले. यानंतर सुरेखा घुगे, सुनीता कातकडे यांनी आरडाओरड केली. मात्र, तोपर्यंत चोरटे पळून गेले होते. दीड लाख रुपयांचे सोन्याचे गंठण लांबविल्याने नवा मोंढा ठाण्यात दोन अनोळखी इसमांविरुद्ध तक्रार देण्यात आली. सहायक पोलिस निरीक्षक प्रभाकर कवाळे तपास करीत आहेत.