सात शहरांतील घरांच्या विक्रीमध्ये दुपटीने झाली वाढ

1 / 7

जुलै ते सप्टेंबर या तिमाहीत देशातील प्रमुख ७ शहरांतील घरांची विक्री दुपटीने वाढून ६२,८०० युनिटवर गेली. याच कालावधीत घरांच्या सरासरी किमतीत ३ टक्क्यांची वाढ झाली आहे.

2 / 7

मालमत्ता क्षेत्रातील सल्लागार संस्था ‘ॲनारॉक’ने केलेल्या सर्वेक्षणातून ही माहिती समोर आली आहे. सर्वेक्षण अहवालात म्हटले आहे की, गृहकर्जाच्या व्याज दरात झालेली कपात आणि आयटी व तंत्रज्ञान क्षेत्रातील जबरदस्त नोकर भरती यामुळे सात प्रमुख शहरांतील घरांची मागणी वाढली आहे. त्याचा हा परिणाम आहे.

3 / 7

गेल्या वर्षीच्या या कालावधीत २९,५२० घरांची, तर आदल्या तिमाहीत २४,५६० घरांची विक्री झाली होती.

4 / 7

सर्वेक्षण करण्यात आलेल्या सात शहरात दिल्ली-एनसीआर, मुंबई मेट्रोपॉलिटन रिजन (एमएमआर), चेन्नई, कोलकता, बंगळुरू, हैदराबाद आणि पुणे यांचा समावेश आहे. या सात शहरांतील घरांच्या किमती ३ टक्क्यांनी वाढून सरासरी ५,७६० चौरस फूट झाल्या आहेत. गेल्या वर्षीच्या या कालावधीत हे दर ५,६०० रुपये चौरस फूट होते.

5 / 7

‘ॲनारॉकचे चेअरमन अनुज पुरी यांनी सांगितले की, सात प्रमुख शहरांतील आयटी व तंत्रज्ञान क्षेत्रातील कंपन्यांकडून मोठ्या प्रमाणात नोकर भरती केली जात आहे.

6 / 7

त्याचा परिणाम म्हणून या क्षेत्रातील व्यावसायिकांच्या वेतनात मोठी वाढ झाली आहे. रोजगाराची सुरक्षा वाढल्यामुळे लोक घरे खरेदी करण्याचे धाडस करीत आहेत.

7 / 7

दिल्ली-एनसीआरमधील घर विक्री ९७ टक्क्यांनी वाढून १०,२२० युनिटवर गेली. मुंबई महानगर क्षेत्रामध्ये गेल्या वर्षीच्या जुलै-सप्टेंबर तिमाहीत ९,२०० घरे विकली गेली होती. यंदा हा आकडा वाढून २०,९६५ झाला आहे. पुण्यातील घरांची विक्री १०० टक्क्यांनी वाढून ९,७०५ युनिटवर गेली आहे.