ऑनलाइन लोकमतनागपूर, दि . 13 - डान्सिंग स्टार टायगर श्रॉफ आणि अभिनेत्री निधी अग्रवाल यांच्या झुमके स्टाईलने नागपूरकरांना अगदी बेभान केले. जगप्रसिद्ध पॉपस्टार मायकल जॅक्सनच्या स्मृतिदिनानिमित्त आणि मुन्ना मायकल या आगामी चित्रपटाच्या प्रमोशनसाठी टायगर व निधी तसेच सुप्रसिद्ध गायक सिद्धार्थ महादेवन काल बुधवारी नागपुरात आले होते. यावेळी टायगर श्रॉफ याने अभिनेत्री निधी अगरवालसमवेत दिलखेचक अदांसह ठेका धरला. यावेळी मुन्ना मायकलच्या कलाकारांसोबत सेल्फी काढण्यासाठी सर्वांची झुंबड उडाली होती.नागपूरमध्ये कोराडी मार्गावरील मानकापूर येथील विभागीय क्रीडा संकुलातील इन्डोअर स्टेडियममध्ये टायगर श्रॉफने मायकल जॅक्सनला अनोखी नृत्यांजली वाहिली. लोकमत आणि प्रीति आयआयटी पिनॅकल यांच्या सहयोगाने मायकल जॅक्सनला नृत्यांजली म्हणून टायगरचा हा कार्यक्रम आयोजित केला होता.टायगर व निधी स्टाररमुन्ना मायकल हा चित्रपट लवकरच प्रेक्षकांच्या भेटीस येतो आहे. याच मुन्ना मायकलच्या एक्झॉटिक लव्ह साँगवर टायगर व निधी या दोघांनी धम्माल डान्स करत नागपूरकरांना आपल्या तालावर नाचवले. दिल हैं आवारा तो ऐतराज क्यो हैं... या पहिल्याच गाण्यावर टायगर व निधी असे काही थिरकलेत की, अख्खे स्टेडियम नाचायला लागले.यानंतर मेरी वाली डिंग, डांग, डिंग, डांग, डिंग, डांग, डिंग, डांग, करती हैं... या गाण्यावरच्या टायगरच्या डान्सने तर अख्खे स्टेडिअम बेभान झाले. प्रेक्षकांनी खचाखच भरलेले स्टेडिअम पाहून टायगर श्रॉफ व निधी अग्रवाल या दोघांना या गर्दीसोबत सेल्फी काढण्याचा मोह आवरता आला नाही. सिद्धार्थ महादेवनही मग त्यांच्यात सामील झाला. या तिघांनी नागपुरकरांसोबत झक्कासपैकी सेल्फी घेतला.मी जगभरात फिरलोय. पण नागपूरसारखे दर्दी चाहते पाहिले नाहीत. हजारो प्रेक्षकांच्या साक्षीने मी आज बोलतोय. मी आज याठिकाणी तुमच्याशी संवाद साधतोय, याचे संपूर्ण श्रेय लोकमतचे आहे. यासाठी मी सर्वप्रथम लोकमतचे आभार मानेल, असे टायगर श्रॉफ म्हणाला.मुन्ना मायकल हा निधी अग्रवालचा पहिला चित्रपट. या पहिल्याच चित्रपटाचा अनुभव निधीने नागपूरकरांशी शेअर केला. पहिल्याच चित्रपटात मला टायगर आणि नवाजुद्दीन सिद्दीकीसोबत काम करण्याची संधी मिळाली, हे माझे भाग्य आहे. टायगरने मला बरीच मदत केली. मी डान्स शिकले आहे. पण तरिही त्याच्यासोबत डान्स करताना मी प्रचंड नर्व्हस होते. पण त्याने मला माझे नवखेपण विसरायला भाग पाडले. त्याच्यासोबत काम करण्याचा अनुभव धम्माल होता, असे निधी म्हणाली.सिद्धार्थ महादेवन याने दिल हैं आवारा तो ऐतराज क्यो हैं... हे सादर करत, प्रेक्षकांची मने जिंकलीत. यानंतर सिद्धार्थची छोटेखानी मुलाखतही रंगली. यावेळी एका प्रश्नाने सिद्धार्थची चांगलीच गोची केली. तू कंपोझर आहेस आणि गायकही. यापैकी सर्वांधिक तुला काय आवडतं? असा प्रश्न सिद्धार्थला केला गेला. यावर हा फार कठीण प्रश्न आहे. हे म्हणजे दोन मुलांमधून तुझा सर्वाधिक लाडका कोण? असे विचारण्यासारखे आहे, असे सिद्धार्थ म्हणाला.