Corona Vaccination: कोविशील्डचा बूस्टर डोस कधी घ्यायचा?; पुनावालांनी सांगितली 'नेमकी' वेळ

1 / 10

देशात आलेली कोरोनाची दुसरी लाट हळूहळू ओसरत आहे. गेल्या काही आठवड्यांपासून देशात दररोज ५० हजारांपेक्षा कमी रुग्णांची नोंद होत आहे. त्यामुळे आरोग्य यंत्रणेवरील भार काहीसा कमी झाला आहे.

2 / 10

कोरोनाच्या डेल्टा आणि डेल्टा प्लस व्हेरिएंटमुळे प्रादुर्भाव वाढण्याची शक्यता आहे. त्यामुळे तिसरी लाट येऊ शकते अशी भीती व्यक्त होत आहे. कोरोनाच्या लाटेचा तडाखा कमी करण्यासाठी लसीकरणाला वेग देण्याची गरज आहे.

3 / 10

देशात सुरू असलेल्या लसीकरण अभियानात सर्वाधिक वापर कोविशील्डचा सुरू आहे. मात्र कोविशील्डची लस घेतल्यानंतर अवघ्या काही महिन्यांत अँटिबॉडीज कमी होत असल्याची माहिती संशोधनातून समोर आली आहे. त्यामुळे चिंता वाढली आहे.

4 / 10

जगातील अनेक देशांनी कोरोना लसीच्या बूस्टर डोसला परवानगी देण्यास सुरुवात केली आहे. आता यावर पुण्यातल्या सीरम इन्स्टिट्यूट ऑफ इंडियाचे अध्यक्ष सायरस पुनावालांनी भाष्य केलं आहे.

5 / 10

कोविशील्डच्या दोन डोसमधील अंतर सध्या ८४ दिवसांचं आहे. मात्र ते २ महिनेच असायला हवं, असं पुनावाला म्हणाले. कोविशील्डचे दोन डोस घेतल्यानंतर ६ महिन्यांनी तिसरा डोस (बूस्टर डोस) घ्यायला हवा, असंही पुनावालांनी सांगितलं.

6 / 10

कोविशील्डची लस घेतल्यानंतर पुढील २ ते ३ महिन्यांत अँटिबॉडीज ५० टक्क्यांपर्यंत होऊ शकतात, अशी माहिती २ आठवड्यांपूर्वी लॅन्सेटमध्ये प्रसिद्ध झाली. त्याबद्दल पुनावालांना प्रश्न विचारण्यात आला. त्यावर अँटिबॉडीज कमी होतात ही बाब खरी आहे. पण मेमोरी सेल्स कायम राहतात, असं पुनावाला म्हणाले.

7 / 10

बूस्टर डोसची आवश्यकता अधोरेखित करत असताना पुनावालांनी स्वत:चं उदाहरण दिलं. '६ महिन्यांनंतर अँटिबॉडीज कमी होतात. त्यामुळेच मी तिसरा डोस घेतला आहे,' असं पुनावालांनी सांगितलं.

8 / 10

आम्ही जवळपास ८ हजार कर्मचाऱ्यांना तिसरा डोस दिला आहे. ज्या व्यक्तींनी कोविशील्डचे २ डोस घेतलेत, त्यांनी ६ महिन्यांनंतर बूस्टर डोस नक्की घ्यावा, असं आवाहन पुनावालांनी केलं.

9 / 10

दोन डोसमधील अंतर किती असावं यावरही पुनावालांनी भाष्य केलं. लसींचा साठा कमी असल्यानं सरकारनं दोन डोसमधील कालावधी ३ महिने केला. मात्र दोन डोसमधील आदर्श अंतर २ महिने आहे, असं पुनावाला म्हणाले.

10 / 10

कोविशील्ड लसीसाठी ऑक्सफर्ड आणि ऍस्ट्राझेनेकानं संशोधन केलं आहे. लसीच्या उत्पादनासाठी त्यांनी सीरमशी करार केला. सीरम भारतात कोविशील्ड नावानं देत असलेली लस युरोपीय देशांमध्ये ऍस्ट्राझेनेका नावानं ओळखली जाते.