मामे भावाकडून १३ वर्षीय मुलीवर बलात्कार, मुलगी गरोदर राहिल्यानंतर प्रकार समोर

सिंधुदुर्ग जिल्ह्यातील मालवण येथे हा प्रकार घडला...

पिंपरी : तेरा वर्षीय अल्पवयीन मुलीवर तिच्या मामेभावाने लैंगिक अत्याचार केले. यातून ती १८ आठवड्यांची गरोदर राहिली. हा प्रकार २ मार्च ते ११ जून २०२२ या कालावधीत सिंधुदुर्ग जिल्ह्यातील मालवण येथे घडला. 

याप्रकरणी ४० वर्षीय महिलेने रविवारी (दि. १२) भोसरी पोलीस ठाण्यात फिर्याद दिली. फिर्यादी महिलेच्या भावाच्या मुलाविरोधात या प्रकरणी गुन्हा दाखल करण्यात आला. पोलिसांनी दिलेल्या माहितीनुसार, फिर्यादी यांच्या १३ वर्षीय मुलीवर फिर्यादीच्या भावाच्या मुलाने लैंगिक अत्याचार केले. लैंगिक अत्याचारामुळे फिर्यादीची अल्पवयीन मुलगी गरोदर राहिली. मालवण तालुक्यात हा प्रकार घडला. 

फिर्यादी महिलेची बहीण पिंपरी - चिंचवड शहरात वास्तव्यास आहे. पीडित अल्पवयीन मुलगी ही सुट्टीनिमित्त रविवारी (दि. १२) तिच्या मावशीकडे पिंपरी-चिंचवड शहरात आली. त्यानंतर पोटात दुखायला लागले म्हणून अल्पवयीन मुलीला डॉक्टरांकडे नेण्यात आले. त्यावेळी ती १८ आठवड्यांची गरोदर असल्याचे समोर आले. त्यानंतर पीडित अल्पवयीन मुलीच्या आईने पोलिसांकडे धाव घेतली. भोसरी पोलिसांनी गुन्हा दाखल करून घेऊन पोलिसांकडे गुन्हा वर्ग केला.