मिळकतकरातून २४३ कोटी

महापालिकेच्या करसंकलन विभागाने सप्टेंबरअखेर २४३ कोटी रुपये मिळकतकराची वसुली केली असून, मागील वर्षाच्या तुलनेत १४ कोटींनी अधिक वसुली झाली आहे

पिंपरी : महापालिकेच्या करसंकलन विभागाने सप्टेंबरअखेर २४३ कोटी रुपये मिळकतकराची वसुली केली असून, मागील वर्षाच्या तुलनेत १४ कोटींनी अधिक वसुली झाली आहे, अशी माहिती करसंकलन विभागाचे सह आयुक्त दिलीप गावडे यांनी दिली.
पहिल्या सहामाहीत मागील वर्षी सप्टेंबरअखेर मिळकतकराची २२८ कोटी वसुली झाली होती. मागील वर्षाच्या तुलनेत या वर्षी सप्टेंबरअखेर दोन लाख ३३ हजार ३७३ मिळकतधारकांनी २४३ कोटी रुपये मिळकत कराचा भरणा केला असून, ६८ हजार ८९२ मिळकतधारकांनी ६३ कोटी रुपये आॅनलाइन सुविधेचा वापर करून भरणा केला आहे. सोळा करसंकलन विभागीय कार्यालयांपैकी अनुक्रमे मनपा भवन, फुगेवाडी, दापोडी, पिंपरी व निगडी-प्राधिकरण या विभागीय कार्यालयांनी मिळकतकर वसुलीकामी चांगले कामकाज केले आहे. नागरिकांच्या सोईसाठी मिळकतकर भरणा करण्यासाठी वेळ वाढविण्यात येऊन सुटीच्या दिवशी करसंकलन कार्यालये सुरू ठेवण्यात आली होती.
(प्रतिनिधी)


दंडात्मक कारवाई : कर वसुलीसाठी पथक

गावडे म्हणाले, ‘‘सप्टेंबरअखेर थकबाकीसह पहिल्या सहामाहीची रक्कम भरणा न केलेल्या मिळकतधारकांना दोन टक्के प्रतिमाह दराने मनपा शास्तीकराची आकारणी करणेत येणार आहे. तसेच डिसेंबरअखेर दुसऱ्या सहामाहीची रक्कम भरणा न केल्यास दुसऱ्या सहामाही रकमेवर ही दोन टक्के प्रतिमाह दराने मनपा कर शास्तीची आकारणी करण्यात येणार आहे. आॅक्टोबरपासून थकबाकी रक्कम रुपये एक लाखावरील सर्व मिळकतधारकांना मागणीपत्र, जप्तीपूर्व नोटीस देऊन मिळकत जप्तीची कार्यवाही सुरू करण्यात येणार आहे. तरी मिळकतधारकांनी थकबाकीसह तत्काळ मिळकतकराचा भरणा करावा. रक्कम रुपये पाच लाखांवरील थकबाकीदारांना नोटीस बजाविणे, मिळकतकर वसुलीकामी मुख्य कार्यालयामार्फत वसुली पथकाची नेमणूक व असमाधानकारक वसुलीचे कामकाज असलेल्या प्रशासन अधिकारी, सहायक मंडलाधिकारी व गटप्रमुख यांना समज पत्र बजाविले आहे.