"आमची सूत्रे येरवडा जेलमधून हलतात" म्हणत दहशत पसरविणाऱ्या ‘यम भाई’ची पोलिसांनी काढली धिंड

आरोपीने हातात कोयता घेऊन व्हिडीओ तयार केले. ते सोशल मीडियावर पोस्ट करून दहशत निर्माण केली.

पिंपरी : हातात कोयता घेऊन तयार केलेले व्हिडीओ सोशल मीडियावर व्हायरल करून दहशत निर्माण करणाऱ्या ‘यमभाई’ची पोलिसांनी धिंड काढली. तपासासाठी आरोपीला त्याच्या घराच्या परिसरात गुरुवारी (दि. १५) फिरविण्यात आले.

मयुर अनिल सरोदे (वय २१, रा. दुर्गानगर, आकुर्डी) असे अटक केलेल्या आरोपीचे नाव आहे. गुंडा विरोधी पथकातील पोलीस नाईक विजय दत्तात्रय तेलेवार यांनी याप्रकरणी बुधवारी (दि. १४) चिखली पोलीस ठाण्यात फिर्याद दिली. 

आमची सूत्रे येरवडा जेलमधून हलतात, असे म्हणून हातात कोयता घेऊन आरोपीने व्हिडीओ तयार केले. ते सोशल मीडियावर पोस्ट करून दहशत निर्माण केली. याप्रकरणी पिंपरी-चिंचवड पोलिसांच्या गुंडा विरोधी पथकाने बुधवारी आरोपीला ताब्यात घेतले. त्याच्या विरोधात चिखली पोलीस ठाण्यात गुन्हा दाखल करून त्याला अटक केली. त्याच्याकडून कोयता हस्तगत करण्यात आला. दरम्यान तपासाकरिता पोलिसांनी आरोपीला तो राहत असलेल्या दुर्गानगर परिसरात नेले. त्यावेळी त्याच्या हातात बेड्या घालून त्याच्या घरापासून त्याला परिसरात फिरविण्यात आले.