पगाराच्या पार्टीनंतर वाद; भांडणातून तोंडावर सिमेंटची विट मारून मजुराचा खून

पगाराच्या पार्टीनंतर पुन्हा मद्यपानासाठी गेले असता दोघांमध्ये किरकोळ भांडणे झाली

पिंपरी : मद्यधुंद असलेल्या दोन मजुरांमध्ये भांडण झाले. यात एकाने दुसऱ्या मजुराच्या तोंडावर सिमेंटची विट मारून जखमी केले. यात त्याचा मृत्यू झाला. खून प्रकरणी रावेत पोलिस ठाण्यात गुन्हा दाखल करण्यात आला. किवळे येथे सोमवारी (दि. ४) रात्री साडेबाराच्या सुमारास ही घटना घडली. 

विवेक गणेश पासवान (२४, मूळ रा. उत्तरप्रदेश), असे खून झालेल्या मजुराचे नाव आहे. शिवकुमार घनश्याम प्रजापती (१९, रा. मूळ रा. बिरैचा कला, पोस्ट. खंबा, ता. रिधवली, जि. बस्ती, उत्तरप्रदेश) यांनी याप्रकरणी सोमवारी (दि. ४) रावेत पोलिस ठाण्यात फिर्याद दिली. त्यानुसार दिनेश विलास यादव (२०, मूळ रा. बिरैचा कला, पोस्ट. खंबा, ता. रिधवली, जि. बस्ती, उत्तरप्रदेश) याच्या विरोधात पोलिसांनी गुन्हा दाखल केला. 

पोलिसांनी दिलेल्या माहितीनुसार, मुंबई-पुणे महामार्गालगत किवळे येथे रुणाला गेटवे सोसायटीजवळ निर्माण माईल स्टोन ही बांधकाम साईट आहे. या साईटवर विवेक पासवान, संशयित दिनेश यादव आणि फिर्यादी शिवकुमार प्रजापती यांच्यासह अन्य काही जण मजूर म्हणून फरशी बसविण्याचे काम करतात. त्यातील विवेक हा इतर पाच जणांसह साईटवरील पत्र्याच्या खोलीमध्ये राहण्यास होता. त्याचा आणि त्याच्यासोबतच्या इतर मजुरांचा रविवारी पगार झाला. त्यामुळे विवेकने काही मजुरांसह पार्टी केली. त्यानंतर विवेक याच्या खोलीतील इतर चौघे मजूर झोपले असता विवेक आणि दिनेश यादव हे दोघेही पुन्हा मद्यपानासाठी गेले. मद्यपान करून आल्यानंतर त्यांच्यामध्ये किरकोळ भांडण झाले. यात दिनेश यादव याने विवेक पासवान याच्या तोंडावर सिमेंटची विट मारली. यात गंभीर जखमी होऊन विवेक याचा मृत्यू झाला. त्यानंतर दिनेश यादव हा तेथून पळून गेला.

दरम्यान, याबाबत माहिती मिळताच रावेत पोलिसांनी घटनास्थळी धाव घेतली. पिंपरी येथील वायसीएम रुग्णालयात शवविच्छेदन करून विवेक याचा मृतदेह नातेवाईकांच्या ताब्यात देण्यात आला. दिनेश यादव पोलिसांकडून शोध सुरू आहे.