देह विक्रीसाठी नकार दिल्याने सोळा वर्षीय मुलीच्या खुनाचा प्रयत्न; मावळातील धक्कादायक घटना

याप्रकरणी १६ वर्षीय मुलीने शिरगाव पोलिस ठाण्यात फिर्याद दिली आहे...

पिंपरी : देह विक्रीसाठी नकार देणाऱ्या अल्पवयीन मुलीला गळा दाबून व चाकूने वार करत खून करण्याचा प्रयत्न करणाऱ्या तिघांना शिरगाव पोलिसांनी अटक केली. ही घटना रविवारी (दि. २६) व सोमवारी (दि. २७) या दोन दिवसांच्या कालावधीत मावळातील सोमाटणे व गाडुंबरे गावाजवळ घडली.

याप्रकरणी १६ वर्षीय मुलीने शिरगाव पोलिस ठाण्यात फिर्याद दिली आहे. यावरून पोलिसांनी पवन कुमार अयोध्या प्रसाद (वय २३ रा. उत्तर प्रदेश ) महिला आरोपी व दीपक गोवारी यादव (२१, रा. उत्तर प्रदेश) या तिघांना अटक केली आहे.

पोलिसांनी दिलेल्या माहितीनुसार, दीपक यांनी पीडितेशी प्रेम संबंध तयार केले. त्यानंतर पवन कुमार व महिला आरोपीने तिच्याकडे देह विक्रीची मागणी केली. यावेळी पीडितेने त्यांना नकार दिला. तिला मूळगावी सोडण्याचा बहाणा करून तिला दुचाकीवर घेऊन जाऊन संशयित महिला आरोपीच्या भाड्याच्या खोलीत तिला ठेवले. त्यानंतर सोमवारी सायंकाळी तिला अंधारात घेऊन जाऊन तिच्या मानेच्या पाठीमागील बाजूला चाकूने वार केला, तसेच गळा दाबून तिला जीवे मारण्याचा प्रयत्न केला. मात्र, पीडितेने आपली सुटका करून घेत थेट पोलिसांकडे याबाबत तक्रार केली.