भाजप नगरसेवक कुंदन गायकवाड यांचा जात दाखला अवैध,  नगरसेवकपद रद्द होणार  

पिंपरी-चिंचवड महापालिका सार्वत्रिक निवडणुकीत अनुसूचित जाती प्रवगार्तून निवडून आलेले भाजप नगरसेवक कुंदन गायकवाड यांचा जात दावा अवैध असल्याचा निर्णय बुलढाणा जिल्हा विभागीय जात प्रमाणपत्र पडताळणी समितीने दिला आहे. गायकवाड यांनी खोटी, बनावट कागदपत्रे सादर करुन सरकारची फसवणूक केली असून त्यांच्याविरोधात कारवाई करावी, असे आदेशही देण्यात आले आहेत.  

पिंपरी,  दि. 22 - पिंपरी-चिंचवड महापालिका सार्वत्रिक निवडणुकीत अनुसूचित जाती प्रवगार्तून निवडून आलेले भाजप नगरसेवक कुंदन गायकवाड यांचा जात दावा अवैध असल्याचा निर्णय बुलढाणा जिल्हा विभागीय जात प्रमाणपत्र पडताळणी समितीने दिला आहे. गायकवाड यांनी खोटी, बनावट कागदपत्रे सादर करुन सरकारची फसवणूक केली असून त्यांच्याविरोधात कारवाई करावी, असे आदेशही देण्यात आले आहेत.   

     पिंपरी-चिंचवड महापालिकेची निवडणूक फेब्रुवारीमध्ये झाली. या निवडणुकीत गायकवाड हे चिखली प्रभाग क्रमांक एक मधून भाजपच्या उमेदवारीवर  निवडणूक लढविली होती. तसेच विजयीही झाले होते. गायकवाड यांनी कैकाडी जातीचा दाखला सादर करत अनुसूचित जाती प्रवगार्तून निवडणूक लढविली होती. त्यांचे प्रतिस्पर्धी शिवसेना उमेदवार नितीन दगडू रोकडे यांनी गायकवाड यांच्या जातदाखला आणि जात प्रमाणपत्र पडताळणीवर हरकत घेतली होती.  त्यावर बुलढाणा जिल्हा जात प्रमाणपत्र पडताळणी समितीसमोर सुनावणी झाली. दरम्यान प्रमाण पत्र सादर करण्याची मुदत २२ आॅगस्टला संपणार असल्याने गायकवाड यांनी उच्च न्यायालयाकडून एक सप्टेंबरपर्यंत स्थगिती आदेश मिळविला होता. त्यामुळे काही दिवसांचा दिलासा मिळाला होता.

गायकवाड यांचा दावा फेटाळला

बुलढाणा जिल्हा जात प्रमाणपत्र पडताळणी समितीसमोर सुनावणी झाली. अतिरिक्त जिल्हाधिकारी टी.एम.बागुल, उपायुक्त तथा सदस्य व्ही.एस.शिंदे, संशोधन अधिकारी तथा सदस्य सचिव एम.जी.बाठ यांच्या समितीने सर्व कागदपत्रांची पाहणी करुन, दक्षता पथकाचा अहवाल विचारात घेऊन गायकवाड यांचा अनुसूचित जातीचा दावा फेटाळून लावला. ते कैकाडी जातीचे असून सोलापूर जिल्ह्यातील आहेत. सध्या त्यांचे वास्तव्य पुण्यात आहे. सोलापूर जिल्ह्यात कैकाडी समाज विमुक्त जात प्रवर्गात मोडतो. त्यामुळे गायकवाड यांचा अनुसूचित जातीचा दावा रद्द करण्यात येत असल्याचे बुलढाणा जिल्हा जात प्रमाणपत्र पडताळणी समितीने निकाल पत्रात म्हटले आहे.

गुन्हा दाखल होणार 

गायकवाड राखीव प्रवगार्तून मिळणारे फायदे तात्काळ रद्द करावेत. खोटी, बनावट कागदपत्रे सादर करुन फसवणूक केल्याप्रकरणी त्यांच्याविरोधात दक्षता पथकाच्या पोलिस निरीक्षकाने कारवाई करावी, असे आदेशही देण्यात आले आहेत.  त्यामुळे नगरसेवक पद रद्द होण्याबरोबरच त्यांच्यावर गुन्हाही दाखल होणार आहे.