Chinchwad By Election | ठाकरे गटाचे शहर प्रमुख सचिन भोसलेंसह १६ जणांवर गुन्हा दाखल

हाणामारीचा हा प्रकार बुधवारी सायंकाळी साडेपाच ते सहा या कालावधीत थेरगाव येथे घडला...

पिंपरी :शिवसेना उद्धव बाळासाहेब ठाकरे गटाचे शहर प्रमुख ॲड. सचिन भोसले यांच्यावर हल्ला करण्यात आला. या प्रकरणी वाकड पोलीस ठाण्यात परस्पर विरोधात गुन्हा दाखल करण्यात आला. हाणामारीचा हा प्रकार बुधवारी (दि. २२) सायंकाळी साडेपाच ते सहा या कालावधीत थेरगाव येथे घडला.

ॲड. सचिन भोसले यांनी दिलेल्या फिर्यादीनुसार जयदीप संपत माने (वय ४०), आकाश हेगडे (वय ३१), सनी चव्हाण (वय २३), करण अहीर (वय २५), अक्षय कास्तार (वय २५, सर्व रा. वाकड) यांच्या विरोधात गुन्हा दाखल केला. यातील आकाश हेगडे आणि सनी चव्हाण यांना पोलिसांनी अटक केली. पोलिसांनी दिलेल्या माहितीनुसार, फिर्यादी भोसले हे बुधवारी (दि. २२) सायंकाळी साडेपाच ते सहा या कालावधीत राष्ट्रवादीच्या उमेदवाराचा प्रचार करीत असल्याचा राग मनात धरून भाजपचे कार्यकर्ते जयदीप माने, आकाश हेगडे, सनी चव्हाण, करण अहीर, अक्षय कास्तार यांनी संगनमताने फिर्यादी भोसले यांचा रस्ता अडवला. त्यावेळी बाजूला सरण्यास हात केल्याच्या कारणावरून आरोपींनी फिर्यादीला लाथाबुक्क्यांनी मारहाण केली. तसेच फिर्यादी भोसले यांच्या सोबतचे कार्यकर्ते गोरक्षनाथ पाषाणकर यांनाही दुखापत केली व शिवीगाळ करून जखमी केले. 

याच्या परस्पर विरोधात आकाश बापू हेगडे (वय ३१, रा. थेरगाव) यांनी फिर्याद दिली. त्यानुसार सचिन भोसले, त्यांची पत्नी, मुलगा, चुलती तसेच भोसले यांचा बाॅडीगार्ड व त्यांचे पाच ते सहा कार्यकर्ते यांच्या विरोधात पोलिसांनी गुन्हा दाखल केला. पोलिसांनी दिलेल्या माहितीनुसार, फिर्यादी व त्यांचे मित्र बुधवारी सायंकाळी पावणे सहाच्या सुमारास थेरगाव येथे असताना सचिन भोसले हे त्यांच्या पाच ते सहा कार्यकर्त्यांसह आले. त्यांनी फिर्यादीला त्यांच्या प्रचाराचा साऊंडचा आवाज का कमी करायला सांगितला, असे म्हणून फिर्यादीला शिवीगाळ केली. तसेच धक्काबुक्की करून लाथाबुक्क्यांनी मारहाण केली. यात फिर्यादी जखमी झाले.