दुचाकीवरून ट्रिप्सी जाणाऱ्यांना डंपरची धडक; एकाचा मृत्यू तर दोघे जखमी

चालकाच्या विरोधात गुन्हा दाखल, मावळ तालुक्यातील नानोली फाटा येथे गुरुवारी दुपारी एकच्या सुमारास हा अपघात झाला.

ठळक मुद्देअपघाताची माहिती न देता डंपर चालक फरार

पिंपरी : दुचाकीवरून ट्रिप्सी जाणाऱ्यांना डंपरची जोरदार धडक बसल्याने एका तरुणाचा मृत्यू झाला आहे. तर इतर दोघे जखमी झाले आहेत. मावळ तालुक्यातील नानोली फाटा येथे गुरुवारी दुपारी एकच्या सुमारास हा अपघात झाला.

आकाश नारायण राठोड (वय २१, रा. नवलाख उंबरे, ता. मावळ, मूळ रा. वाशिम), असे मृत्यू झालेल्या तरुणाचे नाव आहे. शुभम खेडकर (रा. वाशिम) आणि शिवबहादुर माताफेरमोरय (वय २८, रा. नवलाख उंबरे, मूळ रा. उत्तरप्रदेश), अशी जखमींची नावे आहेत. तर शिवबहादुर यांनी याबाबत तळेगाव एमआयडीसी पोलीस ठाण्यात फिर्याद दिली आहे. त्यानुसार डंपर चालकाच्या विरोधात पोलिसांनी गुन्हा दाखल केला.

पोलिसांनी दिलेल्या माहितीनुसार, शिवबहादूर, त्यांचा मित्र आकाश आणि शुभम असे तिघेजण एका दुचाकीवरून नवलाख उंबरे ते आंबी रोडने जात होते. ते नानोली फाटा येथे आले असता भरधाव डंपरने अचानक वळण घेत असताना शिवबहादूर यांच्या दुचाकीला जोरात धडक दिली. यामध्ये फिर्यादी यांचा मित्र आकाश राठोड हा गंभीर जखमी झाला. त्यातच त्याचा मृत्यू झाला. तर दुसरा मित्र शुभम खेडकर आणि शिवबहादूर जखमी झाले. त्यांच्या दुचाकीचे नुकसान झाले आहे. अपघाताची माहिती न देता अज्ञात डंपर चालक निघून गेला.