'OLX'वर डिलरशीपची जाहिरात देऊन फसवणूक; पिंपरीत गुन्हा दाखल
By लोकमत न्यूज नेटवर्क | Published: May 25, 2021 03:55 PM2021-05-25T15:55:11+5:302021-05-25T15:55:24+5:30
विश्वास संपादन करून लाख रुपयांची फसवणूक....
'OLX'वर डिलरशीपची जाहिरात देऊन फसवणूक; पिंपरीत गुन्हा दाखल
Next पिंपरी : 'ओएलएक्स' वर जाहिरात देऊन डीलरशीप देण्याचे सांगितले. तसेच विश्वास संपादन करून एकाची एक लाख रुपयांना फसवणूक केली. फसवणुकीची पहिली घटना २ ते १७ ऑगस्ट २०२० तर दुसरी घटना १ ते २१ जानेवारी २०२१ या कालावधीत चिंचवड येथे घडली.
प्रतिक प्रवीण कांकरिया (वय ३०, रा. लिंक रोड, चिंचवड) यांनी सोमवारी (दि. २५) याबाबत चिंचवड पोलीस ठाण्यात फिर्याद दिली. ई टू शॉपी कंपनीचे कृष्णा ठाकूर व इंडिया शॉपिंग बाजार या कंपनीचे अनुश्री पाटीदार आणि सुजल पटवा (पूर्ण नाव, पत्ता माहिती नाही), अशी गुन्हा दाखल झालेल्या आरोपींची नावे आहेत.
पोलिसांनी दिलेल्या माहितीनुसार, ई टू शॉपी कंपनीचे कृष्णा ठाकूर यांनी २ ऑगस्ट २०२० रोजी ओएलएक्स या ॲपवर ई टू शॉपी कंपनीची पुणे जिल्ह्यासाठी डिलरशीप देण्याबाबत जाहिरात दिली. त्यासाठी एसबीआय बॅंकेच्या खात्यावर २५ हजार रुपये सुरक्षा रक्कम म्हणून घेतली. मात्र कोणतीही डिलरशीप न देता फसवणूक केली. तसेच इंडिया शॉपिंग बाजार या कंपनीचे अनुश्री पाटीदार आणि सुजल पटवा यांनी २ जानेवारी २०२१ रोजी ओएलएक्सवर कंपनीची डिलरशिप देण्याची जाहिरात पाठविली. त्यासाठी सुरक्षा अनामत म्हणून ७५ हजार रुपये घेतले. तसेच कंपनीचे कोणतेही प्रोडक्ट न देता तसेच घेतलेले पैसे परत न करता आरोपींनी वरील दोन्ही घटनांमध्ये फिर्यादीची एक लाख रुपयांची फसवणूक केली. पोलीस उपनिरीक्षक गणेश माने तपास करीत आहेत.