हाँगकाँगमधून चालवले जाते फसवणुकीचे रॅकेट; पिंपरी-चिंचवड सायबर सेलने पर्दाफाश करून ५ जणांना ठोकल्या बेड्या

पाच आरोपींनी अनेकांची फसवणूक करून मिळालेले कोट्यवधी रुपये क्रिप्टोकरन्सीद्वारे हाँगकाँगमध्ये पाठवले

पिंपरी : शेअर मार्केटमध्ये गुंतवणूक केल्यास जास्त नफा मिळेल, असे आमिष दाखवून फसवणूक करणाऱ्या रॅकेटचा पर्दाफाश केला. हे रॅकेट हाँगकाँगमधून चालविले जात असून पिंपरी-चिंचवड पोलिसांच्या सायबर सेलने याप्रकरणी पाच जणांना अटक केली. त्यांनी अनेकांची फसवणूक करून मिळालेले कोट्यवधी रुपये क्रिप्टोकरन्सीद्वारे हाँगकाँगमध्ये पाठवले.   

जुनेद मुख्तार कुरेशी (२१, रा. टिंगरे नगर, पुणे), आकिफ अन्वर आरिफ अन्वर खान (२९, रा. कोंढवा खुर्द), सलमान मन्सूर शेख (२२), तौफिक गफ्फार शेख (२२), अब्दुल अजीज अन्सारी (२३, तिघेही रा. इंदिरा नगर, लोहगाव रोड, पुणे), अशी अटक केलेल्यांची नावे आहेत. 

गुन्हे शाखेचे पोलिस उपायुक्त संदीप डोईफोडे यांनी दिलेल्या माहितीनुसार, बाणेर येथील एका महिलेने नॅशनल सायबर क्राईम रिपोर्टींग पोर्टलवर (एनसीसीआरपी) तिची फसवणूक झाल्याची तक्रार नोंदवली होती. त्याबाबत हिंजवडी पोलिस ठाण्यात गुन्हा दाखल आहे. या गुन्ह्याचा समांतर तपास पिंपरी-चिंचवड सायबर सेलकडून सुरू होता. फिर्यादी महिलेला इंस्टाग्रामवर शेअर मार्केट क्लासेस आणि शेअर मार्केट गुंतवणूक संदर्भात एक जाहिरात दिसली. त्यांनी त्यावर क्लिक केले. त्यानंतर दिलेल्या सूचना पाळून पुढे गेल्या असता फिर्यादी महिलेला एका व्हाट्सअप ग्रुपमध्ये सहभागी केले. इन्स्टिट्यूशनल डी मॅट अकाउंट काढण्यासाठी अनोळखी संशयितांनी एक अर्ज पाठवला. त्यानंतर शेअर मार्केटमध्ये नव्याने येणाऱ्या कंपन्यांचे आयपीओ खरेदीसाठी महिलेकडून संशयितांनी वेगवेगळ्या बँक खात्यावर ३१ लाख ६० हजार रुपये घेतले. महिलेने गुंतवलेली रक्कम परत मागितली असता ती रक्कम देण्यासाठी संशयितांनी चॅरिटी डोनेशन म्हणून आणखी चार लाख रुपये घेतले.

फिर्यादी महिलेने ज्या बँक खात्यांवर पैसे पाठवले होते, त्या खात्यांचे सायबर सेलने तांत्रिक विश्लेषण केले. त्यानुसार बँक खाते हाताळणारे संशयित निष्पन्न करून पोलिसांनी पाच जणांना अटक केली. त्यांच्याकडून सात मोबाईल फोन, रोख रक्कम मोजण्याची मशीन, आठ डेबिट कार्ड, १२ धनादेशपुस्तिका, एक खातेपुस्तक आणि सात लाखांची रोकड जप्त केली.

पिंपरी-चिंचवड सायबर सेलचे वरिष्ठ पोलिस निरीक्षक संतोष पाटील, सहायक निरीक्षक प्रवीण स्वामी, उपनिरीक्षक सागर पोमण, पोलिस अंमलदार नितेश बिचेवार, अतुल लोखंडे, श्रीकांत कबुले, कृष्णा गवळी, रजनिश तारु, सौरभ घाटे, आशा सानप, ईश्वरी आंभरे यांच्या पथकाने ही कामगिरी केली. 

क्रिप्टोकरन्सीद्वारे पैसे हाँगकाँगला

अटक केलेल्या संशयितांकडे १२० बँक खाते मिळून आले. त्या खात्यांवर संशयितांनी फसवणुकीच्या वेगवेगळ्या प्रकारणांमधील पैसे घेतले. संशयितांनी या खात्यांवरून चार कोटी रुपये रोख स्वरुपात काढून घेतले. खात्यांवर आलेली रक्कम युएसडीटी या क्रिप्टोकरन्सी मार्फत हाँगकाँग या देशात पाठवली. या खात्यांबाबत ७५ पेक्षा अधिक तक्रारी आहेत. 

मुख्य सुत्रधार हाँगकाँगमध्ये

फसवणूक प्रकरणातील मुख्य सुत्रधार ग्रेग हा हाँगकाँग येथे वास्तव्यास आहे. तिथून तो फसवणुकीचे नेटवर्क चालवतो. हाँगकाँगमधून सोशल मीडियासाठी जाहिराती आणि लिंक तयार केल्या जातात. त्या जाहिराती पाहून कोणी संपर्क केल्यास त्या नागरिकांना लगेच फोन येण्यास सुरुवात होते.