VIDEO: होमगार्डला पाच जणांकडून मारहाण; दोन जण ताब्यात

चिखलीतल्या घरकुल परिसरातील घटना; गुन्हा दाखल करण्याचं काम सुरू

पिंपरी : मद्यपान केलेल्या काही जणांकडून दुकानाबाहेर बाचाबाची सुरू होती. होमगार्डने त्यांना हटकले. त्यामुळे पाच जणांनी होमगार्डला मारहाण केली. चिखली येथे घरकुल परिसरात रविवारी दुपारी हा प्रकार घडला. याप्रकरणी पोलिसांनी दोन जणांना ताब्यात घेतले आहे. चिखली पोलीस ठाण्यात सायंकाळी उशिरापर्यंत गुन्हा दाखल करण्याचे काम सुरू होते.

चिखली पोलीस ठाण्याचे वरिष्ठ पोलीस निरीक्षक सतीश माने यांनी दिलेल्या माहितीनुसार, ड्युटी संपल्याने संबंधित होमगार्ड घराकडे निघाला होता. त्यावेळी घरकुल परिसरातील एका दुकानासमोर काहीजण थांबले होते. यातील मद्यपान केलेल्या काही जणांकडून बाचाबाची करण्यात येत होती. तो गोंधळ पाहून होमगार्ड तेथे थांबला. त्यानंतर गोंधळ घालणाऱ्यांना होमगार्डने हटकले. त्याचा राग येऊन ते होमगार्डच्या अंगावर धावून गेले. त्यावेळी होमगार्डने एका तरुणाला काठी मारून ढकलले. त्यानंतर तीन-चार जणांनी होमगार्डला मारहाण केली.

पिंपरीमध्ये पाच जणांकडून होमगार्डला मारहाण pic.twitter.com/oNAc48oL31

— Lokmat (@MiLOKMAT) May 24, 2020

संबंधित होमगार्ड महापालिका सेवेत आहे. शहरात कोरोना योद्धा म्हणून होमगार्डदेखील कार्यरत आहेत. होमगार्ड व पोलिसांवर हल्ले होऊन मारहाणीचे काही प्रकार घडले आहेत. कोरोना योद्धांवर अशा पद्धतीने हल्ले होऊन मारहाण करण्यात येत असल्याने चिंता व्यक्त केली जात आहे.