Pimpri Chinchwad: 'तू फॉर्म भरलास तर तुला पाहून घेईन’, 'मविआ' च्या राहुल कलाटेंची वंचितच्या उमेदवाराला धमकी

माझ्यावर खोटा गुन्हा दाखल करण्यात आलाय, पोलिसांनी सीसीटीव्ही फुटेज तपासावे - राहुल कलाटे

पिंपरी : विधानसभा निवडणुकीसाठी उमेदवारी अर्ज भरण्यासाठी मंगळवारी शेवटचा दिवस असल्याने निवडणूक निर्णय कार्यालयात गर्दी झाली होती. वेगवेगळ्या पक्षांतील उमेदवारांनी अर्ज भरला. याचदरम्यान चिंचवडमधील वंचित बहुजन आघाडीच्या जावेद रशीद शेख यांना महाविकास आघाडीमधील घटक पक्ष असलेल्या राष्ट्रवादी शरदचंद्र पवार पक्षाचे उमेदवार राहुल कलाटे यांनी जीवे मारण्याची धमकी दिल्याप्रकरणी काळेवाडी पोलिस ठाण्यात अदखलपात्र गुन्हा दाखल करण्यात आला आहे. या घटनेमुळे खळबळ उडाली आहे.

पोलिसांनी दिलेल्या माहितीनुसार, चिंचवड विधानसभा मतदारसंघातील उमेदवारांना थेरगाव येथील निवडणूक निर्णय कार्यालयात उमेदवारी अर्ज भरावा लागतो. मंगळवारी दुपारी जावेद शेख वंचित बहुजन आघाडीच्या वतीने उमेदवारी अर्ज भरण्यासाठी आले होते. तेव्हा, राहुल कलाटे यांनी जावेद शेख यांना ‘तू कशाला फॉर्म भरतो आहेस?, तू फॉर्म भरलास तर तुला पाहून घेईन’, अशी दमदाटी करत जीवे मारण्याची धमकी दिली. तसेच निवडणूक संदर्भातील कागदपत्रे गॅलरीमधून फेकून दिल्याची तक्रार काळेवाडी पोलिस ठाण्यात शेख यांनी दिली आहे. याप्रकरणी काळेवाडी पोलिस ठाण्यात अदखलपात्र गुन्हा दाखल करण्यात आला आहे. कलाटे यांनी मंगळवारी उमेदवारी अर्ज भरला, याच दिवशीच त्यांनी वंचित बहुजन आघाडीच्या उमेदवाराला जीवे मारण्याची धमकी दिल्याने खळबळ उडाली आहे.

माझ्यावर खोटा गुन्हा दाखल करण्यात आला आहे. जावेद शेख महिलांच्या बाजूला थांबला म्हणून त्याला दुसरीकडे जाऊन थांबण्यास सांगितले होते. पोलिसांनी सीसीटीव्ही फुटेज तपासावे. - राहुल कलाटे, महाविकास आघाडी उमेदवार