विनाकारण एकाला पट्ट्याने मारहाण करणे पडले महागात, तिघांच्या विरोधात गुन्हा दाखल

शिवीगाळ करत कंबरेच्या पट्ट्याने मारहाण करून केले जखमी

ठळक मुद्देपिंपरी येथील इंदिरा गांधी उड्डाणपुलाखाली असलेल्या कुरेशी शॉपच्या समोरील मोकळ्या जागेत हि घटना घडली

पिंपरी: उड्डाणपुलाखाली  मोकळ्या जागेत एक व्यक्ती बसली असताना 'तू इथे का बसला', असे म्हणत शिवीगाळ करत कंबरेच्या पट्ट्याने तिला मारहाण केल्याचा प्रकार घडला आहे. ती व्यक्ती जखमी झाली असून तिघांच्या विरोधात गुन्हा दाखल करण्यात आला आहे. पिंपरी येथील इंदिरा गांधी उड्डाणपुलाखाली सोमवारी ही घटना घडली. 

दत्ता अनिल देशमुख (वय ३७, इंदिरा गांधी उड्डाणपुलाखालील मार्केटमधील मोकळ्या जागेत, पिंपरी) यांनी या प्रकरणी पिंपरी पोलीस ठाण्यात सोमवारी फिर्याद दिली आहे. फारुख कुरेशी (वय ४५, रा. नेहरू नगर, पिंपरी) व अनोळखी दोघे यांच्याविरोधात गुन्हा दाखल करण्यात आला आहे. 

पोलिसांनी दिलेल्या माहितीनुसार, देशमुख हे पिंपरी येथील इंदिरा गांधी उड्डाणपुलाखाली असलेल्या कुरेशी शॉपच्या समोरील मोकळ्या जागेत झोपेतून उठून बसले होते. फारूक कुरेशी तेथे येऊन देशमुख यांना 'येथे का बसला', अशी विचारणा केली. ते उत्तर देण्याअगोदरच कुरेशीने शिवीगाळ करून त्यांच्या तोंडावर लाथ मारली. त्यामुळे ते जमिनीवर पडले. त्यावेळी त्याच्या सोबतच्या दोघांनी कंबरेच्या पट्ट्याने देशमुख याना मारून जखमी केले, असे फिर्यादीत नमूद केले आहे. पिंपरी पोलीस पुढील तपास करत आहेत.