माचिस न दिल्याच्या रागातून डोक्यात दगड घालून केले एकाला जखमी

तीन साथीदारांच्या विरोधात गुन्हा दाखल

ठळक मुद्देडोक्यात दगड घालून लाकडी दांडक्याने पायावर मारत जखमी केले

पिंपरी: माचिस न दिल्याच्या रागातून एकाच्या डोक्यात दगड घालून मारहाण करून जीवे ठार मारण्याचा प्रयत्न केला. आकुर्डी येथे गुरुवारी (दि. ३) सायंकाळी सातच्या सुमारास ही घटना घडली.

हिमांशू मुन्नालाल गुप्ता (वय २९, रा. चिंचवड), असे जखमी तरुणाचे नाव आहे. याबाबत त्यांनी निगडी पोलीस ठाण्यात फिर्याद दिली. त्यानुसार राजवंश राजमंदर सिंग दुधानी, अभिषेक बनसोडे (दोघे रा. दळवीनगर झोपडपट्टी, चिंचवड) आणि त्यांच्या तीन साथीदारांच्या विरोधात गुन्हा दाखल केला आहे.

पोलिसांनी दिलेल्या माहितीनुसार, गुप्ता कामावरून रस्त्याने पायी जात होते. त्यावेळी आकुर्डी रेल्वे स्टेशनकडे जाणाऱ्या रोडवर दारू पिलेल्या राजवंशने त्यांच्याकडे माचिस मागितली.त्यांनी माचीस नसल्याचे राजवंशला सांगितले. यावरून त्याने गुप्ता यांना धमकी देत मारहाण करण्यास सुरुवात केली. त्यांच्या डोक्यात दगड घालून लाकडी दांडक्याने पायावर मारत जखमी केले. त्यानंतर अन्य साथीदारांना बोलावून गुप्ता यांना दगडाने, लाकडी दांडक्याने मारले. निगडी पोलीस तपास करत आहेत.