धक्कादायक ! विद्युत डीपीच्या आगीत अनोळखी इसम जळून खाक

डांगे चौक येथील विद्युत डीपीच्या संपर्कात येऊन लागलेल्या आगीत एक अनोळखी इसम जळून खाक झाल्याची घटना रविवारी (दि. १३) दुपारी एकच्या सुमारास थेरगावातील डांगे चौकात घडली.

वाकड : डांगे चौक येथील विद्युत डीपीच्या  संपर्कात येऊन लागलेल्या आगीत एक अनोळखी इसम जळून खाक झाल्याची  घटना रविवारी (दि. १३) दुपारी एकच्या सुमारास थेरगावातील डांगे चौकात घडली. या घटनेचे फोटो आणि व्हिडीओ सोशल मीडियावर मोठ्या प्रमाणात व्हायरल झाले. 

याबाबत वाकड पोलिसांनी दिलेली  माहिती अशी, डांगे चौकातील विजेच्या डीपीला मोठी आग लागल्याची माहिती नियंत्रण कक्षाकडून पोलिसांना मिळाली. पोलिसांनी घटनास्थळाची पाहणी केली असता डीपीमध्ये एक अनोळखी इसम जळत असल्याचे दिसून आले. पोलिसांनी नागरिकांच्या मदतीने आग विझवण्याचा प्रयत्न केला मात्र आग विझविण्यात ते अपयशी झाले. मात्र अग्निशमन दलाच्या जवानांनी विद्युत पुरवठा बंद करून आग विझविली. मात्र, त्या आधीच अनोळखी इसम पूर्ण जळून त्याचा होरपळून मृत्यू झाला होता. 

 डीपी बॉक्समध्ये अर्धवट जळालेली चादर आढळून आल्याने तो इसम फिरस्ता असल्याची शक्यता पोलिसांकडून वर्तवण्यात येत आहे. मात्र त्याची पक्की ओळख पटू शकली नाही.पुढील तपास वाकड  पोलिस करीत आहेत.