करोडपती झालेल्या पीएसआय सोमनाथ झेंडे यांच्या मागे चौकशीचा ससेमिरा

ऑनलाईन गेममुळे एका झटक्यात करोडपती झाल्याने आले चर्चेत

नारायण बडगुजर, लोकमत न्यूज नेटवर्क, पिंपरी : ऑनलाईन गेममुळे एका झटक्यात करोडपती झालेले पोलिस उपनिरीक्षक निरीक्षक सोमनाथ झेंडे सध्या चर्चेचा विषय ठरले आहेत. मात्र, ऑनड्युटी असताना ‘गेम’ खेळल्याने कर्तव्यात कसूर केल्याचा आरोप त्यांच्यावर काही जणांनी केला. त्यामुळे झेंडे यांची चौकशी करण्यात येणार आहे. 

ऑनलाइन गेमच्या माध्यमातून करोडपती झालेले सोमनाथ झेंडे हे चाकण पोलिस ठाणे येथे नेमणुकीस होते. दरम्यान, डिसेंबर २०२१ मध्ये त्यांच्यावर लाचलुचपत प्रतिबंधक विभागाने एक गुन्हा दाखल केला. तक्रारीवर कारवाई न करण्यासाठी झेंडे यांनी एकाकडे ८५ हजार रुपयांची मागणी केली होती. झेंडे यांच्यासाठी लाचेची रक्कम स्वीकारताना एका खासगी इसमाला लाचलुचपत प्रतिबंधक विभागाच्या पथकाने रंगेहात पकडले होते. याची दखल घेत उच्चपदस्थ अधिकाऱ्यांनी झेंडे यांना तडकफडकी निलंबित केले होते.

दरम्यान, झेंडे यांची नियुक्ती साईड ब्रँच असलेल्या आरसीपी (दंगा काबू पथक) येथे झाली. या पथकाकडून मंगळवारी (दि. १०) उर्से टोल नाका येथे बंदोबस्त लावण्यात आला होता. त्यावेळी पथकात असलेल्या झेंडे हे ऑनड्युटी असताना त्यांना ऑनलाईन गेममध्ये तब्बल दीड कोटींचे बक्षीस लागल्याचे समजले.

गृहमंत्र्यांकडे तक्रार

ऑनड्युटी असलेल्या झेंडे यांना बक्षीस लागल्याची बातमी वाऱ्यासारखी पसरली. सोशल मीडियावर झेंडे व्हायरल झाले. त्यावरून झेंडे यांच्यावर आरोप देखील झाले. झेंडे यांच्यावर कारवाई करण्यात यावी, अशी मागणी भाजपाचे अमोल थोरात यांनी केली. राज्याचे गृहमंत्री तथा उपमुख्यमंत्री देवेंद्र फडणवीस यांच्याकडे याबाबत निवेदन दिले.

पोलिस उपनिरीक्षक सोमनाथ झेंडे यांच्यावर कारवाईबाबत प्रशासकीय तसेच कायदेशीर बाबी तपासण्यात येतील. पोलिस उपायुक्त स्वप्ना गोरे याबाबत चौकशी करत आहेत. चौकशीनंतर कारवाईबाबत निर्णय घेण्यात येईल. 
- सतीश माने, सहायक पोलिस आयुक्त तथा जनसंपर्क अधिकारी