अमरनाथच्या ढगफुटी दुर्घटनेतून बचावले; पण हृदयविकारामुळे निधन झाले, पिंपरीतील भाविकाचा मृत्यू

पुणे जिल्हा आणि पिंपरी-चिंचवड शहरातून शेकडो भाविक अमरनाथ यात्रेसाठी गेले आहेत

पिंपरी : अमरनाथ येथे ढगफुटी होऊन दुर्घटना घडली. यात पिंपरी-चिंचवड शहरातील भाविक सुखरूप आहेत. मात्र, त्यातील एकाचा हृदयविकाराने मृत्यू झाला. सुखरुप असलेले भाविक रविवारी परतीचा प्रवास करणार आहेत. 

पुणे जिल्हा आणि पिंपरी-चिंचवड शहरातून शेकडो भाविक अमरनाथ यात्रेसाठी गेले आहेत. गजानन महाराज खेडेकर यांच्यासोबत यात्रेकरू व इतर व्यवस्थापक मिळून २०० जण चार खासगी बसव्दारे अमरनाथ यात्रेसाठी गेले आहेत. तसेच गजानन (अजय) महाराज सोनवणे यांच्यासोबत यात्रेकरून व इतर व्यवस्थापक असे ५५ जण या यात्रेसाठी गेले आहेत.  

दरम्यान, अमरनाथ येथे ढगफुटी होऊन पाण्याचा लोंढा भाविकांच्या लंगरमध्ये घुसला. त्यामुळे काही भाविक वाहून गेले. या दुर्घटनेनंतर पिंपरी-चिंचवड शहरातील काही भाविकांचा संपर्क होत नव्हता. मात्र, शनिवारी सायंकाळपर्यंत सर्वच भाविकांचा संपर्क होऊन ते सुखरूप असल्याचे सांगण्यात आले. तसेच गजानन महाराज खेडेकर यांच्यासोबत गेलेल्या भाविकांपैकी प्रदीप नाथा खराडे (रा. काळेवाडी, पिंपरी-चिंचवड) यांचा हृदयविकाराचा त्रास होत असल्याने त्यांना रुग्णालयात दाखल करण्यात आले. शनिवरी पहाटे त्यांना डाॅक्टरांनी मृत घोषित केले. रुग्णवाहिकेने खराडे यांचा मृतदेह पिंपरी-चिंचवड येथे आणण्यात येत आहे.