लोणावळ्यात टेम्पो आणि कारचा भीषण अपघात; 5 ठार आणि 3 जखमी

मुंबई पुणे राष्ट्रीय महामार्गावर लोणावळ्यातील साई मोरेश्वर हॉटेलसमोर आयशर टेम्पो व रिट्झ कार यांच्यात समोरासमोर झालेल्या भीषण अपघातात कारमधील पाच जण जागीच ठार झाले

लोणावळा : मुंबई-पुणे राष्ट्रीय महामार्गावर लोणावळ्यातील साई मोरेश्वर हॉटेलसमोर आयशर टेम्पो व रिट्झ कार यांच्यात समोरासमोर झालेल्या भीषण अपघातात कारमधील पाच जण जागीच ठार झाले, तर तीनजण जखमी झाले आहेत. आज शनिवारी रात्री 9 वाजण्याच्या सुमारास हा अपघात झाला. 

मिळालेल्या माहितीनुसार जुन्या मुंबई पुणे राष्ट्रीय महामार्ग क्रमांक ४ वर हॉटेल साई मोरेश्वर समोर एका रिट्झ कारला (एम.एच.०४.डी. वाय.६३४६) भरधाव वेगातील आयशर टेम्पो ( एम.एच.०९.बी. सी.८२७८) ने जोरदार धडक दिल्याने भीषण अपघात झाला. या अपघातात कार मध्ये बसलेल्या एकूण ७ जणांपैकी ५ जणांचा जागीच मृत्यू झाला असून २ जण गंभीर जखमी झाले आहे. मृतांमध्ये ४ महिला व एका पुरुषाचा समावेश आहे. उर्वरित दोन्ही महिलाही गंभीर जखमी असून त्यांची परिस्थिती चिंताजनक असल्याचे सांगण्यात येत आहे. याशिवाय टेम्पो चालक ही जखमी असून त्यांच्या पायाला मार लागला आहे. अपघातग्रस्त कारमध्ये बसलेले सर्वजण लोणावळ्यातील रिदम या हॉटेलचे कर्मचारी असून काम संपवून घरी निघाले असताना हा अपघात झाला.