शहरातील अपघातांत तिघांचा मृत्यू

निगडी, दिघी, हिंजवडी पोलीस ठाण्यांच्या हद्दीत झालेल्या तीन वेगवेगळ्या अपघातांत तिघांचा मृत्यू झाला. चिखलीजवळील हरगुडे वस्ती येथील शिवशंभो चौकात

पिंपरी : निगडी, दिघी, हिंजवडी पोलीस ठाण्यांच्या हद्दीत झालेल्या तीन वेगवेगळ्या अपघातांत तिघांचा मृत्यू झाला. चिखलीजवळील हरगुडे वस्ती येथील शिवशंभो चौकात शुक्रवारी रात्री दहाच्या सुमारास झालेल्या अपघातात शहाजी अनंतराव पवार (वय ७०, रा. शाहूनगर, चिंचवड) या वृद्धाचा मृत्यू झाला. याप्रकरणी संतोष मधुकर गायकवाड (वय ३०, रा. मोरेवस्ती, चिखली) या मोटार चालकावर गुन्हा दाखल करण्यात आला आहे. शहाजी पवार पायी जात असताना गायकवाड यांच्या भरधाव वेगातील मोटारीची त्यांना धडक बसली. यामध्ये पवार गंभीर जखमी झाल्याने त्यांचा मृत्यू झाला. याप्रकरणी निगडी पोलीस ठाण्यात गुन्हा दाखल करण्यात आला आहे.
तर रस्ता ओलांडत असताना मोटारीची धडक बसल्याने दिलीपसिंह नंदसिंह (वय ३७, रा. लोधीरोड, दिल्ली) यांचा मृत्यू झाला. याप्रकरणी मोटारचालक जगदीश राजाराम पाटील (रा. कोथरूड, पुणे) याच्यावर गुन्हा दाखल करण्यात आला आहे. पोलिसांनी दिलेली माहिती अशी - शुक्रवारी रात्री साडेनऊच्या सुमारास वाकडहून कोथरूडकडे जाताना पाषाण तलावाजवळील रस्ता नंदसिंह ओलांडत होते. दरम्यान, पाटील याच्याकडील भरधाव वेगातील मोटारीची नंदसिंह यांना धडक बसली. गंभीर जखमी झाल्याने त्यांचा मृत्यू झाला.
डुडुळगाव जकात नाक्याजवळ झालेल्या अपघातात रामू सुग्गन दिवाकर (वय ३५, रा. देहूफाटा, आळंदी) या सायकलस्वार तरुणाचा मृत्यू झाला. ही घटना ८ आॅगस्टला सकाळी सव्वासातच्या सुमारास घडली. दिवाकर हे पेरू आणण्यासाठी सायकलवरून आळंदीकडून मोशीकडे जात असताना भरधाव मोटारीची त्यांना धडक बसली. यामध्ये दिवाकर जखमी झाले. (प्रतिनिधी)