Pimpri-Chinchwad: पिंपरीत चोरांचा सुळसुळाट; दुकान फोडून ५२ मोबाईलसह ३ लाखांचे साहित्य चोरीला

दुकानाचे शटर उचकटून ५२ मोबाईल फोन तसेच ब्लूटूथ संच, पावर बॅंक, स्मार्ट वॉच, कॅमेरे, असे तीन लाख १४ हजार ६६९ रुपयांचा मुद्देमाल चोरून नेला

पिंपरी : अज्ञात चोरट्यांनी दुकानाचे शटर उचकटून ५२ मोबाईल फोन तसेच ब्लूटूथ संच, पावर बॅंक, स्मार्ट वॉच, कॅमेरे, असे तीन लाख १४ हजार ६६९ रुपयांचा मुद्देमाल चोरून नेला. रुपीनगर, तळवडे येथे सोमवारी (दि. १४) रात्री साडेनऊ ते मंगळवारी (दि. १५) सकाळी सहा या कालावधीत हा प्रकार घडला. हनुमंत कल्याण ढेरे (वय ३२, रा. श्रीराम कॉलनी, रुपीनगर, तळवडे) यांनी या प्रकरणी चिखली पोलीस ठाण्यात फिर्याद दिली. 

पोलिसांनी दिलेल्या माहितीनुसार, फिर्यादीचे रुपीनगर येथे सक्षम एंटरप्राइजेस या नावाचे दुकान आहे. फिर्यादीने ते दुकान रविवारी रात्री साडेनऊच्या सुमारास बंद केले. त्यानंतर अज्ञात चोरट्यांनी दुकानाचे शटर उचकटून दुकानात प्रवेश केला. दुकानातून विविध कंपन्यांचे ५२ मोबाईल फोन, दोन टॅब, स्मार्ट वॉच, एअर बड्स, ब्ल्यूटूथ संच, दोन कॅमेरे, २० पावर बॅंक, असा एकूण तीन लाख १४ हजार ६६९ रुपये किमतीचा मुद्देमाल चोरट्यांनी चोरून नेला. हा प्रकार मंगळवारी सकाळी सहाच्या सुमारास उघडकीस आला. याप्रकरणी घरफोडीचा गुन्हा दाखल करण्यात आला. पोलीस उपनिरीक्षक विवेक कुमटकर तपास करीत आहेत.