प्रियकराकडून गोळ्या झाडून तरुणीचा खून; हिंजवडीतील धक्कादायक घटना

खून प्रकरणामुळे आयटी पार्क परिसरात खळबळ उडाली

पिंपरी : प्रियकराने गोळ्या झाडून तरुणीचा खून केला. हिंजवडी येथे रविवारी (दि. २८) हा प्रकार उघडकीस आला. याप्रकरणी पोलिसांनी प्रियकर तरुणास ताब्यात घेतले आहे. खून प्रकरणामुळे आयटी पार्क परिसरात खळबळ उडाली आहे. 

वंदना द्विवेदी (रा. उत्तर प्रदेश) असे खून झालेल्या तरुणीचे नाव आहे. ऋषभ निगम (रा. उत्तर प्रदेश) असे ताब्यात घेतलेल्या तरुणाचे नाव आहे. पोलिसांनी दिलेल्या प्राथमिक माहितीनुसार, ऋषभ निगम हा वंदना हिचा प्रियकर आहे. त्याने शनिवारी (दि. २७) रात्री उशिरानंतर वंदना हिच्यावर गोळ्या झाडल्या. यात तिचा मृत्यू झाला. हिंजवडी येथील लक्ष्मी चौकात ही घटना घडली. याबाबत माहिती मिळताच पोलिसांनी घटनास्थळी धाव घेतली. तसेच ऋषभ याला ताब्यात घेतले. वंदना हिच्यावर गोळीबार का करण्यात आला, हा प्रकार रात्री नेमका किती वाजता घडला, याबाबत पोलिस तपास करीत आहेत.