Pooja Chavan Death Case: राठोडांच्या राजीनाम्याची जोरदार चर्चा अन् शिवसेनेत सुरू झाली वेगळीच स्पर्धा

Pooja Chavan Death Case: संजय राठोड आज मंत्रिपदाचा राजीनामा देण्याची शक्यता; राठोड यांच्या राजीनाम्यासाठी मुख्यमंत्र्यांवर दबाव

मुंबई: पूजा चव्हाण मृत्यू प्रकरणामुळे (Pooja Chavan Death Case) चर्चेत आलेल्या आणि अनेक गंभीर आरोप झालेल्या वनमंत्री संजय राठोड यांचा राजीनामा घेण्यासाठी मुख्यमंत्री उद्धव ठाकरेंवर (CM Uddhav Thackeray) दबाव वाढला आहे. भारतीय जनता पक्षानं राठोड यांच्या राजीनाम्यासाठी अतिशय आक्रमक भूमिका घेतली आहे. तर राठोड यांनी राजीनामा घेतला जाऊ नये यासाठी पक्षावर दबाव आणण्यास सुरुवात केल्याची चर्चा सुरू झाली आहे.

संजय राठोडांचा राजीनामा तडकाफडकी घेऊ नका; मुख्यमंत्री ठाकरेंवर महंतांचा दबाव?

एकीकडे संजय राठोड यांच्या राजीनाम्याची चर्चा सुरू असताना दुसरीकडे शिवसेनेचे विदर्भातील आमदार कामाला लागले आहेत. राठोड यांच्यावर होत असलेल्या आरोपांचा परिणाम मुख्यमंत्री उद्धव ठाकरे आणि सरकारच्या प्रतिमेवर होत असल्याचा दावा या गटाकडून केला जात आहे. त्यामुळे राठोड यांचा राजीनामा घेण्याची मागणी या गटानं लावून धरली आहे. राठोड यांच्या राजीनाम्यानंतर पूर्व, पश्चिम विदर्भाला मंत्रिपद मिळायला हवं, अशी या गटाची भावना आहे.

छत्रपती शिवराय, राजदंड अन् राजधर्म! संजय राऊतांचं सूचक ट्विट; आज राठोड राजीनामा देणार?

संजय राठोड यांच्या राजीनाम्यानंतर रिक्त होणाऱ्या मंत्रिपदासाठी विदर्भासोबतच मुंबईतले आमदारही सक्रिय झाले आहेत. मुख्यमंत्र्यांच्या निकटवर्तीयांच्या माध्यमातून मंत्रिपदासाठी जोरदार लॉबिंग सुरू आहे. आपला पत्ता कापला जाऊ नये यासाठी उत्सुक आमदार सावध पवित्र्यात आहेत. त्यामुळे मंत्रिपदासाठी उत्सुक असलेल्या आमदांराची नावं गुलदस्त्यात आहेत. राठोड यांच्या राजीनाम्यानंतर वनमंत्रिपदाची जबाबदारी दुसऱ्या नेत्याकडे दिली जाणार की मंत्रिपदाचा पदभार इतर एखाद्या मंत्रिपदाकडे दिला जाणार, याची चर्चा सुरू झाली आहे.

राठोडांसाठी महंतांचा दबाव
संजय राठोड यांचा राजीनामा तडकाफडकी घेतला जाऊ नये, अशी विनंती पोहरादेवीच्या महंतांकडून केली जात आहे. राठोड यांचा राजीनामा घेण्यापूर्वी मुख्यमंत्र्यांनी चर्चा करावी, असं आवाहन महंतांकडून करण्यात आली आहे. 'पूजा चव्हाण मृत्यू प्रकरणात आधी चौकशी होऊ द्या. दोषी आढळून येईपर्यंत त्यांचा राजीनामा घेऊ नका,' असं पोहरादेवीचे महंत जितेंद्र महाराज 'एबीपी माझा' वृत्तवाहिनीशी बोलताना म्हणाले.

'आमच्याकडून, बंजारा समाजाकडून मुख्यमंत्री ठाकरेंवर दबाव टाकण्याचा कोणताही प्रयत्न नाही. उद्धव ठाकरे अतिशय संवेदनशील मुख्यमंत्री आहेत आणि आम्ही त्यांचा आदर करतो. आम्ही केवळ समाजाची भावना मांडत आहोत. मुख्यमंत्री, सरकारवर दबाव टाकण्याचा आमचा हेतू नाही,' असं जितेंद्र महाराज यांनी स्पष्ट केलं. संजय राठोड पुन्हा पोहरादेवीला येऊ शकतात असंदेखील त्यांनी पुढे सांगितलं. 'राठोड पुन्हा पोहरादेवीला येणार असल्याचं आम्हाला त्यांच्या निकटवर्तीयांकडून समजलं आहे. ते इथे आल्यास महंतांशी चर्चा करून पुढील वाटचालीबद्दल निर्णय घेतील,' असं महाराज म्हणाले.