“शिवसेनेचे सगळेच ‘संजय’ बेशिस्त आहेत यात कसलीही शंका नाही; आधी राऊत, मग राठोड अन् आता...”

भाजपा आमदार संजय कुटे यांनी शिवसेनेवर निशाणा साधत आमदार संजय गायकवाड यांच्या विधानाचा निषेध केला आहे.

ठळक मुद्देसंजय गायकवाड किती खालच्या पातळीवर जाऊन टीका करू शकतात याचे प्रमाण त्यांनी दिले आहे. जोपर्यंत संजय गायकवाड यांच्यावर गुन्हा दाखल होत नाही तोपर्यंत भाजपाच्यावतीनं जिल्हाभर आंदोलन करणार आहे शिवसेना आमदार संजय गायकवाड यांच्याविरोधात भाजपा नेते एकवटले

मुंबई – शिवसेना आमदार संजय गायकवाड यांनी देवेंद्र फडणवीसांवर केलेल्या वादग्रस्त टीकेनंतर शिवसेना-भाजपा आमनेसामने आल्याचं पाहायला मिळत आहे. शिवसेनेचे सगळेच ‘संजय’ बेशिस्त आहेत, यात आता कसलीही शंका उरली नाही. आधी राऊत, नंतर राठोड आणि आता संजय गायकवाड अशा शब्दात भाजपा आमदार संजय कुटे यांनी शिवसेनेचा समाचार घेतला आहे.

आमदार संजय कुटे यांनी संजय गायकवाड यांचा पुतळा जाळून निषेध केला. संजय गायकवाड किती खालच्या पातळीवर जाऊन टीका करू शकतात याचे प्रमाण त्यांनी दिले आहे. जोपर्यंत संजय गायकवाड यांच्यावर गुन्हा दाखल होत नाही तोपर्यंत भाजपाच्यावतीनं जिल्हाभर आंदोलन करणार आहे असा इशारा आमदार संजय कुटे यांनी दिला आहे.

काम कमी बाते जादा..!!

शिवसेनेचे सगळेच 'संजय' बेशिस्त आहेत, यात आता कसलीही शंका उरली नाही...
आधी राऊत, नंतर राठोड आणि आता संजय गायकवाड. @BJP4Maharashtra

— Dr.Sanjay Kute- डॉ.संजय कुटे (@DrSanjayKute) April 18, 2021

आमदार संजय गायकवाडांची धमकी

संजय कुटेसारखे आमदार दारू पिऊन वावरात पडलेले असतात. त्याला सर्व शौक आहे तो मवाली आहे. तुझ्या मायनं दूध पाजलं असेल तर ५० मीटर माझ्या जवळ येऊन दाखव तुला संजय गायकवाड काय आहे ते दाखवतो अशी धमकी शिवसेना आमदार संजय गायकवाड यांनी भाजपा आमदार संजय कुटे यांना दिली आहे. माझ्याविरोधात तक्रार काय देता? मीच तुमच्याविरोधात तक्रार करतो. राज्यातील लोक मरू लागले आणि तुम्ही आंदोलन करताय. लोक मरत आहेत त्याला जबाबदार तुम्ही आहात असा आरोपही संजय गायकवाड यांनी केला आहे.

“तुझ्या मायनं दूध पाजलं असेल तर...”; शिवसेना आमदार संजय गायकवाडांची भाजपा आमदाराला धमकी

...अन्यथा जनता पातळी दाखवेल.

मविआ सरकारचे मुख्यमंत्री केवळ टिव्हीवर आणि त्यांचे नेते माध्यमांवर भाषणबाजी करण्यातच धन्यता मानतात. जनतेचं काम करायचं आहे तर रस्त्यावर उतरून जनसेवा करून दाखवा. खालच्या पातळीचं राजकारण करणं सोडा, अन्यथा जनताच तुम्हाला तुमची पातळी दाखवेल असा टोला भाजपानं ट्विटरवरून दिला आहे.

देवेंद्र फडणवीसांवर केली होती टीका

'तुमच्या सरकारमुळे लाखो लोक मरतील त्याचं काय? ज्याचा घरातला माणूस मरतो, ज्याच्या घरात जीव जातो, त्याला समजतं की कोरोना काय आहे? मला कोरोनाचे जंतू सापडले असते तर मी देवेंद्र फडणवीसांच्या तोंडात कोंबून टाकले असते असं विधान संजय गायकवाड यांनी केले होते.